Page 35 - AHATA
P. 35
Otmar Oduber ta sigui cu su campaña di manipulacion di opinion publico, cu e unico
obhetivo pa influencia y convence parlamentarionan, cu ta cuestiona cambio di ley di
Serlimar di 2005.
Un ley cu por cierto e mesun Otmar a vota CONTRA na 2005. Esaki Booshi Wever, lider
di UPP ta bisa den un declaracion fuerte contra e mandatario. Na dos ocacion caba
parlamento a debati riba e ley y tur dos biaha esaki a wordo suspendi abruptamente,
pasobra NO tabata tin sosten pa pasa e ley.
Pa logra haya sosten Otmar a trata den tur sorto di forma pa cambia parti di e ley,
resultando den un ley completamente “gelapi”. Pero te ainda e no por a convence e
parlamentarionan di su coalicion pa vota pa e ley aki. Pues siendo e Scorpion cu nos
conoce, Otmar a dicidi di cambia strategia y hiba e debate den un full otro rumbo di
SALUD y uzando awor di repente rapport di PAHO como arma principal.
Remarcabel ta cu den e ley mes Otmar casi no ta haci mencion di e aspecto di salud. Den
e MvT riba pagina 3 ela referi na e rapport di PAHO, pero respecto e aspecto di medio
ambiente. Su excusa ta cu e no kier a uza e dolor y sufrimento di e habitantenan pa pasa e
ley. Diripiente awor si esaki, uzando rapport di PAHO, a bira importante. Diripente ta usa
contacto cu un habitante pa purba di hustifica su ansha pa “bulldoze” e cambionan.
Pakico e no a usa e rapport aki pa contra-aresta e ponencianan di e rapport di Arcadis? E
contesta ta simpel. Otmar tabata convenci cu elo haya sosten di coalicion den parlamento.
Otmar a invita pueblo pa lesa e rapport di PAHO, cu lo a sugeri cu dump lo mester ta sera
“ayera y no awe” pa motibo di e peliger eminente pa salud di e personal di dump como e
habitantenan di e bario.
