Page 5 - AM210918

Diabierna, 18 September 2021 AWEMainta.com 5
Varios studiante Arubiano ta test positivo

pa Covid ora cu nan a regresa Hulanda

Recientemente un grupo grandi di
studiante Arubiano, a regresa Hulanda pa
sigui cu nan estudio avansa despues di a

pasa un vacacion largo aki na Aruba.

Sinembargo awor cu universidad y otro
scolnan avansa na Hulanda a habri bek,

algun a rekeri cu e studiantenan tin cu
atende e lesnan en persona, pero otronan
ta sigui lesnan ainda na cas.

Loke ta interesante den e grupo di
hobennan aki, ta cu AWEMainta a ricibi
informacion di varios studiante cu a test
positivo despues di nan yegada na Hulanda

y mester a bay den cuarentena mesora.

Di e grupo aki un di e hobennan aki mester
a wordo interna den hospital pa problema

respiratorio pero for di anta-ayera e
por a regresa su cas ya cu el a recupera
rapidamente despues di a ricibi tratamento
specialisa.

Notabel di varios di e casonan di
studiantenan cu a test positivo, t’e hecho
cu algun a haci test aki na Aruba prome

cu nan a inicia nan biahe di regreso y nan
resultado a sali negativo y nan por a biaha
sin problema.

Despues di a yega Hulanda algun di nan
mester a haci otro test pa entre otro nan scol
y den esakinan varios di nan a test positivo
di cual mayoria no ta presenta sintomanan

relaciona cu Covid.

Na Hulanda Gobierno e siman aki a anula
e distanciamento rekeri di un meter y mey

mas otro reglanan cu tabata vigente, pero
ainda tin cantidad di demostracion tumando
lugar, sigur contra di cierto exigencia cu
Gobierno a pone pa ciudadanonan cu kier

drenta negoshinan horeca.

E demonstracionnan ta birando mas grandi
y mas violento ya cu e hendenan kier biba

liber pa tuma nan propio decisionnan pa
loke ta regarda nan libertad pa move y
actua.