Page 7 - AM210918
P. 7
Diabierna, 18 September 2021 AWEMainta.com 7
Grupo grandi di studiante na Colegio Arubano
a protesta contra e dress code di e scol
Ayera un grupo grandi di studiantenan
di Colegio Arubano a manda un carta
pa Rectorado di Colegio Arubano,
manifestando cu nan no ta di acuerdo cu
awor Colegio Arubano kier introduce un
dress code p’e scol. E carta ta splica den
detayes nan argumento y e studiantenan
ta pidi Rectorado pa tuma nan protesta na
serio.
Diabierna mainta, tabatin un protesta
cu a tuma lugar n’e Capelo Grote Kant di
Colegio Arubano durante eerste pauze, cu
ta trata e tema di e dress code di e scol. E
studiantenan a presenta nan mes den shirt
blanco como parti di e protesta y a vocifera
na cla e frustracionnan cu nan ta sintiendo.
Esaki ta bin despues cu e scol a dicidi di
implementa diferente regla nobo pa cu e
dress code, cu segun studiantenan cada aña
ta bira mas y mas extremo y sin base.
Algun di e reglanan ta inclui prohibicion
di ‘sweatpants’, prohibicion di bisti
jeans cu cualkier buraco (tapa of no
tapa), prohibicion pa bisti short cortico
y prohibicion pa bisti short di gym pa
nombra un par. Hopi di nan tabata carga
poster tambe, cu ta bisa por ehempel: “My
education is more important than what I
wear” y “Stop sexualizing teenage bodies.”
Como parti di e protesta ademas a skirbi
un carta dirigi na Rectoraat di e scol, cu ta
trece dilanti tur e punto y frustracionnan di
e banda di e alumnonan, p’asina kisas yega
na un cambio.
Un alumno cu a representa e voz di tur e
studiantenan presente durante e protesta,
Kian Herrera, a splica con e docentenan y
conrectornan ta trata nan na un manera
inhusto simplemente ora ta yega scol bisti
den paña cu den e docente su bista no ta
adecua y ta nenga nan entrada di scol na un
manera “hopi baho y fresco”.
Tin biaha ta hasta “halsa nan voz y intimida
mucha.” Un parti di e frustracion tambe ta
bin n’e hecho cu SE/CP Week ta yegando
pronto y ta haya fastioso ora docente manda
mucha cas enbes di laganan atende les.
E schoolleiding a tuma e carta y lo sinta cu
un grupo di e scol pa wak si por yega na un
acuerdo entre e schoolleiding y e muchanan
cu lo keda na agrado di ambos partido.
