Page 31 - AWEMAINTA
P. 31
Diamars, 27 Februari 2018 AWEMainta 31
Deporte
Federacion di tennis di mesa a tene
nan torneo di ranking luna di februari
E sistema di ranking ta uno hopi importante pa e federacion di tennis
di mesa, esta Aruba Table Tennis Association unda hungadornan tin
cu lucha cada torneo pa keda halto den puntuacion y posicion pa
asina e representacion den exterior por ta mas cu bisto na fabor di
esnan cu ta sobresali. Den e ultimo añanan por a ripara cu esaki a
yuda masha hopi unda un grupo di hoben ta lucha cabes cabes cu
otro pa yama nan mes e miho den nan categoria. E competencia aki
sin duda ta uno sano y e mayoria ta haya e chens pa midi nan nivel
den exterior esaki den torneonan renombra manera e Panamericano
di tennis di mesa, Weganan Suramericano Hubenil y clasificacion
Olimpico Hubenil. ATTA ta sigui hasi nan maximo esfuerzo pa cumpli
cu nos muchanan organisando torneonan individual y team. Dentro
di algun dia atletanan di tenis di mesa tin un otro compromiso den
exterior ora nan bishita Cuba pa e clasificacion pa e Weganan CAC di
Barranquilla, Colombia.
Pa loke ta e resultado di ranking di februari mester bisa cu den e
categoria U10 nos a haya na prome lugar Dylan de Leca, na di dos
lugar a keda Nathan Lobo mientras na di tres lugar nos ta haya
Brandon de Leca. Diamars a sigui cu e categoria A Klas unda nos a
haya na prome lugar keto bay Mario Lobo mientras na di dos lugar a
keda Ching Ho Chung y na di tres lugar Andy Gomes. Den B klas e
hoben Donald Yarzagaray a sa na domina cu un prome lugar mientras
na di dos lugar a keda Wingchow Leong y na di tres lugar a termina
Jean Pierre Helmeyer. Diaranzon a sigui cu e weganan den e categoria
U15 unda nos a haya na prome lugar Bob Chung, na di dos lugar a
keda Marvin Diaz y na di tres lugar Mikayla Mathilda. Por ultimo
diabierna e weganan a sigui den Club Estrella na Sta Cruz unda a
hunga den e categoria U18. Aki e bataya tabata super fuerte entre
Hoek, Mathilda y ChingHo. E hoben Jeandry Mathilda a logra e
prome lugar mientras e di dos lugar a bay pa Ching Ho Chung y e di
tres lugar pa Jean Claude Hoek.
Un danki sigur na Lotto, e Loteria di Aruba pa medio di St.
Sportsubsidie Aruba cu a subsidia e calendario annual di Aruba Table
Tennis Association.
Cumprando weganan di Lotto, e Loteria di Aruba bo ta contribui
na deporte riba nos isla. Meta di e fundacion ta pa organisa loteria,
cambia bida di su hungadonan y na mes momento inverti den deporte
local pa medio di donacionnan na e St. Sportsubsidie Aruba.
