Page 35 - MIN VOS

Minister ta bisa cu tin hopi placa, anto mi ta puntra pa kico no a mantene sikiera e
facilidadnan si no tabatin tempo pa deporte e ultimo 3 aña y mey, van Putten tas plica.

Tuma p. e. cancha di basketball na Village, 4 aña pasa el a wordo renova pa colega di
partido y ex Minister di Turismo Otmar Oduber. Awe e ta un berguensa pa mira con nada
a wordo haci mas y e luga a wordo laga na su cuenta. Pero danki na eleccion por ta awor
atrobe e lo por haya atencion y Gobierno por core renob’e pasobra mester voto.

E mesun storia cu Esso Ville, un bunita luga, pero bandona pa falta di vision y
maneho. Como politico den un partido forsa nobo bo no kier ta negativo y ni punta dede
pero mester conscientisa e pueblo rib’e falta di maneho cu a hiba e deporte unda e ta awo.

Tur Minister ta mete riba e tereno di deporte sin cu tin un plan di maneho.

Joe Laveist Ballpark a wordo renoba dor di Minister de Meza, di otro banda Minister
Presidente tambe ta regala material sin pensa con nan lo wordo mantene y no ta involucra
e federacion di e deporte mes.

Linear Park a wordo traha dor di ex Minister di Turismo Otmar Oduber, anto mi pregunta
ta unda e maneho di deporte a keda, pakico mester a warda asina hopi pa bin cu un plan
di maneho?, van Putten ta cuestiona.

E proximo gobernacion mester pone ful atencion pa cu nos deporte. E mester bira un
prioridad! No por y no mag di neglisha esaki mas. Mester hiba e deporte bek na nos
pueblo, na nos hobennan, na nos barionan y scolnan. Maneho di deporte no por ta mas
“show and tell”, mira ki facilidad mi a traha sino e mester ta mira cuanto hende ta
practica deporte y percura pa nan salud.

Mi maneho cu sosten di boso e deportista, e hoben y e famia ta pa percura cu e placa
wordo uza p’asina tur cu kier por tin e oportunidad pa practica deporte.

Nos barionan mester tin e facilidad pa brinda un lugar sano y sigur unda nan por move.

Nos scolnan mester debido atencion p’asina desde hoben nan por crece cu e bon habito di
deporte. Nos no por ignora e importancia di e cartera aki y mester un persona cu lo por
trece a cambio aki. Experencia y “know how” lo por cambia e rumbo di e decadencia den
deporte, Jacky van Putten ta conclui.