Page 36 - MIN VOS

JACKY VAN PUTTEN, POR DANKI NA

ELECCION DEPORTE TIN ATENCION

05/06/2017 Admin Uncategorized Leave a comment

Ultimo simannan nos por a tuma nota con tin interes a aumenta un biaha mas
pa deporte…claro mirando cu ta aña de eleccion. Pa ultimo añanan nos por a
mira un ausencia completo di nos gobierno den deporte. Citando nos mesun
minister di deporte, e no tabatin tempo pa deporte e prome 3 añanan, ya cu pa
su persona e cartera di salubridad ta mas importante. Faltando 3 luna prome cu
eleccion diripiente tin tur atencion pa deporte y a core pone un conferencia pa
delinea awo un programa pa 10 aña y bin cu tur sorto di comision pa asina duna
deporte su atencion debido. ‘A little to Little, a little to late’, aunke esaki no ta
sorprende mi, hopi politiconan a core campaña prometiendo cielo y tera pa cu
nos deportistanan y deporte en general y ora e momento yega nos no ta mira
nada di e promesanan.

Politiconan cu enberdad no sa kico ta come of bebe den deporte y ta priminti tur
sorto di solucion te ora nan sinta y mira cu realidad ta otro. Mi por bisa esaki
pasobra ami a sinta 34 aña bou di tur gobierno y por a experencia esaki
personalmente. Un maneho deficiente of miho dicho un ausencia di maneho den
e ultimo gobernacion a hiba deporte na un estado critico. E estado di e
facilidadnan ta deplorabel y sin uzo.

Minister ta bisa cu tin hopi placa, anto mi ta puntra pa kico no a mantene sikiera
e facilidadnan si no tabatin tempo pa deporte e ultimo 3 aña y mey. Tuma por
ehempel cancha di basketball na Village, 4 aña pasa e la wordo renova pa colega
di partido y ex minister di Turismo Otmar Oduber. Awe e ta un berguensa pa
mira con nada a wordo haci mas y e luga a wordo laga na su cuenta. Pero danki
na eleccion por ta awor atrobe e lo por haya atencion y gobierno por core renove
pasobra mester voto.

E mesun storia cu Esso Ville, un bunita luga, pero bandona pa falta di vision y
maneho. Como politico den un partido forsa nobo bo no kier ta negativo y ni
punta dede pero mester concientisa e pueblo riba e falta di maneho cu a hiba e
deporte unda e ta awo. Tur minister ta mete riba e tereno di deporte sin cu tin
un plan di maneho. Joe Laveist Ballpark a wordo renova door di Minister de
Meza, di otro banda Minster President tambe ta regala material sin pensa con
nan lo wordo mantene y no ta involucra e federacion di e deporte mes.