Page 6 - HOH

6 LOCAL
Educa, fuerte—y toch husga:
E prehuicio contra hende muhe sin yiu
DEN combersacionnan moderno tocante igualdad,
hende muhe hopi biaha ta para uni contra formanan
externo di discriminacion—pago desigual, sexismo,
acoso, of standardnan dobel den sociedad. Y toch,
tin un forma di exclusion mas silencioso y priva cu
ta tuma luga den e structura mes di e hermandad
entre muhe. E ta loke algun ta yama e sindroma di
“Bo lo no compronde”—ora mamanan, consciente of
inconscientemente, ta descarta hende muhe sin yiu
como incompleto, no cualifica, of emocionalmente
superficial. E ta un herida social cu poco hende ta
papia di dje, pero cu hopi ta sinti profundamente.
E division silencioso aki ta manifesta su mes den
maneranan sutil. Un hende muhe sin yiu por comparti
un storia tocante stress of amor, pa despues tende:
“Lo bo compronde ora bo tin yiu.” E declaracion, hopi
biaha bisa sin mal intencion, ta carga un mensahe
pisa: cu inteligencia emocional, compasion, y hasta
e esencia di ser muhe ta yega na madurez completo
AWEMainta Diahuebs, 16 October 2025
solamente via maternidad. Pero e suposicion aki ta anula e diversidad di
experencianan di hende muhe. Un muhe por ta cariñoso door di duna les,
cuida otro, of lidera—e por stima profundamente, sacrifica grandemente, y
construi comunidad sin nunca duna luz. Invalida esey no ta djis insensitivo; e
ta yega na rand di discriminacion social.
Entre hende muhe, e control emocional aki hopi biaha ta manifesta su mes
como un herarkia silencioso—uno cu ta refleha e mesun patriarcado cu hende
muhe ta bringa contra dje. Mamanan ta conecta riba e cansancio comparti,
anochinan sin drumi, y e peso moral di lanta yiu. E lucha comparti ey ta crea
un solidaridad poderoso, pero tambe bareranan invisibel. Hopi hende muhe
sin yiu ta haya nan mes sutilmente exclui for di gruponan social of comber-
sacionnan, como si fuera nan no a gana nan luga como muhe completo. E ta e
mesun exclusion cu hende muhe ta experiencia for di homber den espacionan
profesional—solamente cu awo, e ta interno, entre hende muhe cu mester ta
aliado.
Loke ta haci e asunto aki mas preocupante ta cu educacion no ta kit’e. Hasta
den ambientenan profesional of feminista, e prehuicio emocional aki ta persisti.
Hende muhe altamente educa—esnan cu a lesa, investiga, y hasta aboga
pa inclusion—por ainda inconscientemente ekivala maternidad cu superio-
ridad emocional. E sistema di creencia aki, pasa di generacion pa genera-
cion, ta profundamente cultural. Den sociedadnan unda famia y maternidad
ta simbolonan sagrado di ser muhe, no tin yiu—sea pa escogencia, circun-
stancia, of infertilidad—ainda ta carga un husgamento silencioso. E mensahe
no bisa ta cla: “Bo ta exitoso, pero no completo.”
E mentalidad aki ta haci daño na ambos banda. E ta isola hende muhe sin
yiu, haciendo nan cuestiona nan balor of nan luga, y e ta pone un carga
riba mamanan door di mara nan balor unicamente na nan rol maternal.
Empoderamento berdadero ta exigi pa nos kibra e ciclo aki—no door di nenga
e beyesa di maternidad, sino door di desconect’e for di e definicion di ser muhe.
Compasion, sabiduria, y madurez no ta nace via biologia, sino via experencia
biba y empatia. E siguiente evolucion di feminismo mester atende cu esaki—
no djis igualdad entre genero, sino igualdad entre hende muhe mes.