Page 9 - AHATA

24 DEPORTE AWEMainta Diamars, 24 Maart 2026

Minister Gerlien Croes:

Pa prome biaha Aruba ta anfitrion di

evento C.A.C. Open Water Qualifier 2026

MINISTER di Deporte, sra. mr. Gerlien Croes, a
expresa su satisfaccion y orguyo cu Aruba a fungi
como anfitrion pa prome biaha di e C.A.C. Open Water

Qualifier 2026, un logro significativo pa e desaroyo
continuo di deporte den nos pais.

E competencianan, cu a tuma luga na Mangel Halto

durante fin di siman cu a pasa, a reuni atletanan di 18
pais, incluyendo Aruba. E participacion amplio aki ta
confirma e crecemento di Aruba como un plataforma
confiabel pa evento deportivo di nivel internacional.

E iniciativa a wordo realisa danki na colaboracion
estrecho entre Panam Aquatics y Aruba Aquatics
Federation, un ehempel di con cooperacion inter-

nacional ta contribui na fortalecemento di structura
deportivo local y regional.

Minister Gerlien Croes a enfatisa cu e exito di e evento

aki ta alinea cu e vision di su ministerio pa inverti den
deporte como un instrumento esencial pa desaroyo
social, oportunidad pa hobennan y posicionamento
internacional di Aruba.

“Nos ta orguyoso cu a scoge Aruba como anfitrion pa
un evento di e caliber aki. Esaki ta confirma cu nos
ta riba e caminda corecto pa sigui desaroya deporte

y crea oportunidadnan pa nos atletanan”, segun
Minister Gerlien Croes.

Minister Gerlien Croes a felicita tur e atletanan cu a

participa, y specialmente esnan cu a logra resultado
sobresaliente cu cualificacion pa C.A.C. (Weganan
Centroamericano y di Caribe). Tambe a expresa
gradicimento na Panam Aquatics y Aruba Aquatics

Federation pa nan confianza den Aruba.

Un palabra di reconocemento special ta bay na tur
boluntario y officials cu a haci e evento un exito total,

cu nan compromiso y dedicacion.

Minister Gerlien Croes ta reafirma su compromiso pa
sigui haci su esfuerso pa atrae y facilita eventonan

internacional, fortaleciendo e ecosistema deportivo y
impulsando desaroyo di talento local di Aruba.