Page 3 - HOH

Diabierna, 6 Juni 2025 AWEMainta
Kico ta e miho terapia pa Autismo?
E contesta no ta ‘One Size Fits All’
ORA un mucha wordo diagnostica cu autismo, un di e prome
preguntanan cu famia ta haci ta: “Kico ta e miho terapia?” E
berdad ta, no tin un contesta simpel y universal. Autismo ta un
spectrum, y loke ta funciona bon pa un persona kisas no ta pas
pa otro. E terapia mas efectivo ta individualisa, respetuoso, y
responsivo. Esey hopi biaha ta nifica uza un mescla di acerca-
mento adapta na e forsa, desafionan, y estilo di comunicacion
unico di e mucha.
Terapianan Conocí y nan Controversianan
Un di e terapianan mas ampliamente conoci ta Applied Behavior
Analysis (ABA). E ta altamente structura y enfoca riba siña habi-
lidadnan nobo pa medio di ripiticion, refuerso, y siguimiento di
datonan. ABA hopi biaha ta wordo uza pa construi rutinanan,
mehora comunicacion, y reduci comportacionnan cu por ta
dañino of disruptivo. Pa algun famia, specialmente esnan cu
mucha chikito of esnan cu ta busca un plan cla cu metanan
medibel, ABA por ta un fundacion util.
Sinembargo, ABA no ta sin su criticonan. Hopi adulto autista y
abogadonan di neurodiversidad a lanta preocupacion tocante
con e ta wordo uza — particularmente ora e enfoke ta mas riba
haci muchanan parce “normal” cu yuda nan prospera manera
nan ta. Cu tempo, mas proveedor di ABA a adopta metodonan
mas suave, basa riba wega, pero preocupacionnan ta keda si e
terapia semper ta respeta e autonomia y identidad di e mucha.
Otro Opcionnan Importante y nan Beneficionan
Pesey hopi famia ta explora otro opcionnan — of combina terapi-
anan pa atende cu diferente necesidad.
Occupational Therapy (OT) ta un complemento popular pa ABA.
E ta specialmente util pa muchanan cu ta lucha cu procesamento
sensorial, habilidadnan motorico fini, of tareanan diario manera
skeiro djente of bisti paña. Sesionnan di OT hopi biaha ta enfoca
riba yuda muchanan regula nan curpa y nabega den nan ambi-
ente na maneranan cu ta sinti sigur y manehabel.
Speech and Language Therapy ta otro pida clave di e puzzle,
particularmente pa muchanan cu no ta verbal of tin retraso di
papia. E terapista aki ta yuda muchanan desaroya habilidadnan
di comunicacion — sea cu ta siña forma palabra, uza señanan,
of comunica pa medio di aparatonan di comunicacion aumenta-
tivo y alternativo (AAC). Yuda un mucha haya su bos, den cualkier
forma cu esey ta, por cambia bida.
Pa mayornan cu ta balora conexion emocional y construccion di
relacion, DIR/Floortime ta un alternativa cada biaha mas popular.
LOCAL 8
En bes di enfoca riba coregi comportacion, e acercamento aki
ta stimula wega comparti y union. Terapista ta sigui e mucha su
guia y ta crea momentonan di siñamento pa medio di alegria y
interaccion.
SCERTS (Social Communication, Emotional Regulation, and
Transactional Support) ta otro modelo creciente, particular-
mente den ambiente escolar. E ta promove comunicacion y habil-
idadnan di maneho di situacionnan real pa medio di colaboracion
entre maestronan, mayornan, y terapista.
Pues kico ta e miho terapia? E ta depende — no solamente di
e necesidadnan di e mucha, sino di e balornan y recursonan
di famia. Hopi mayor ta mescla acercamentonan: ABA pa siña
rutinan, OT pa necesidadnan sensorial, y terapia di papia pa
comunicacion. Otronan ta enfoca riba modelonan mas holistico
of basa riba relacion.
Na Aruba, mescos cu den hopi parti di mundo, tin terapistanan
capasita y apasiona cu ta traha tur dia pa sostene muchanan cu
autismo. Mayornan y profesionalnan ta comprometi pa yuda e
muchanan aki prospera. Pero ta berdad tambe cu nos por haci
mucho miho — y mas.
Acceso na terapia por ta limita, tempo di espera ta largo, y servi-
cionan hopi biaha ta scars. Tin un necesidad creciente pa mas
inversion den intervencion trempan, training continuo, y educa-
cion inclusivo, pa cada mucha, sin importa diagnostico, por
alcansa su potencial completo.
Segun nos comprension di autismo ta evoluciona, asina tambe
nos sistemana di sosten mester evoluciona. E meta no ta pa
drecha ningun hende, sino pa construi un mundo unda cada
mucha ta wordo sosteni pa ken nan ta. Cu mas concientisacion,
colaboracion, y inversion — Aruba por ta parti di e progreso ey.