Page 56 - ZIKA

A raporta e prome casonan di Zika Virus na Aruba

Thursday, 11 February 2016 18:51
Comparti

Desde cu e virus di Zika a demostra di ta plamando rapidamente den Latino America y Caribe,
Departamento di Salud Publico di Aruba no a para keto.
A intensifica campaña di conscientisacion pa comunidad por ta alerta riba e virus di Zika y a haci
apelacion na comunidad pa tuma e medidanan di prevencion ora bishita paisnan unda e virus di Zika ta
circulando. Tambe a haci suplica na henter comunidad pa hunto nos yuda tene Aruba liber di sangura
door di deshaci di potencial criaderonan di sangura paden y pafo di cas.
Tur esaki a wordo haci pa na momento cu Aruba haya su prome caso di Zika importa, cu tabata un
cuestion di tempo, nos por preveni cu e virus lo por plama rapidamente na Aruba. Lamentablemente
preveni cu nos lo haya e virus di Zika na Aruba ta imposibel considerando cu nos ta un pais turistico cu ta
ricibi diariamente turista di tur parti mundo.
Riba 10 di februari Departamento di Salud Publico di Aruba a haya resultado riba testnan manda
Hulanda pa Zika, di 16 test cu a wordo manda 4 a bin bek positivo pa Zika. Nos por informa cu tur 4 caso
ta trata di personanan cu a biaha pa otro pais cu tin brote di Zika y a keda infecta cu esaki. Nos ta yama
esakinan casonan importa. Te cu awe ainda nos no conoce niun caso local caminda un persona cu no a
biaha, a keda infecta cu Zika aki na Aruba.
Zika compara cu Dengue y Chikungunya no ta presenta sintomanan severo, pero por ta peligroso pa e
baby cu no a nace ainda, como cu e virus di Zika por perhudica e desaroyo normal di e baby ocasionando
Microcefalia. Pa e motibo aki tambe Departamento di Salud Publico ta recomenda tur señora na estado
pa preveni di wordo pica pa sangura. Cana preferibel cu paña cu tin manga y pia largo y uza repelente
contra sangura cu ta contene “Deet” 40%.
“Sin criadero no tin sangura, sin sangura no tin Zika, Dengue ni Chikungunya”. Pa mas informacion por
tuma contacto cu Departamento di Salud Publico na tel. 5224200.