Page 3 - AWEMAINTA

Diabierna, 25 Mei 2018 AWEMainta 3

OM a pidi 15 aña pa homber cu a propina Chini

Tse Mora un hinca mortal den curason

DIA 14 di juni Fernando M.F., lo scucha e decision di Corte
di e acusación di asesinato cu Ministerio Publico a presenta
contra dje. Pa OM a keda proba asesinato y intento di
asesinato pa cual a pidi un castigo di 15 aña incondicional.
Famia di e victima Chini Tse Mora tabata den sala di Corte
pa sigui tratamento di e caso y tambe pa pidi Corte ordena e
acusado paga gastonan di entiero di nan ser keri.
E homber, di nacionalidad Colombiano, ta wordo acusa di
asesinato y intento di asesinato (riba amigo di e victima
fatal) di e hecho cu a tuma luga na Tanki Leendert riba
12 di november, 2017. E diasabra prome cu e sucedido e
acusado a sali riba un paranda, bebiendo cerbes y whisky, y
diadomingo den oranan di madruga el a dicidi di bay cas. El
a duna tres persona lift.
Na caminda pa cas, segun e testigonan den e auto, e homber
a rabia pa motibo di un otro chauffeur cu tabata coriendo
malo. El a dicidi di pasa e auto aki pa despues para nan dilanti
y stroba nan di sigui. Aki ta cuminda cu e problemanan a
cuminsa.
E acusado aki a baha y a bay direccion di e otro auto pa
reclama e chauffeur, kende tabata compaña pa un amigo
(Mora) y dos dama. E tres personanan cu a haya lift cu e
acusado, a declara nan a mira con Fernando tabata discuti
cu e otro grupo di persona y dado momento a bolbe pa su
auto. Nan a dicidi di bay for di e sitio pasobra no tabata kier
problema. Si nan por a bisa cu e acusado aki tabata mustra
hopi agresivo.
E acusado mes ta bisa di no ta corda kico a pasa despues
cu el a haya un golpi den cara. E no sa kende a dal’e. E
memoria di dje ta cuminsa bek ora cu el a lanta riba cama
na su cas cu su paña sushi na sanger. El a kere cu tabata di e
golpi na su cara.
Testigonan tin un otro version. Nan ta bisa cu e homber aki
tabata hopi agresivo y hasta a expresa “este golpe se paga con
la muerte” y a cana bay direccion di su auto, unda el a coy
un obheto, cu a resulta di ta un “voltmeter” cu tin un punta
fini. Esaki el a hinca Mora cun’e den su pecho, net na su di e victima. Despues di a hinca e homber aki, el a cana bay
curason. Esey tabata motibo cu e hinca aki a kita bida mesora riba e chauffeur di e auto y a bisa, segun testigonan, “Yo te
quiero matar a ti tambien.” El a stop di haci intento pa agredi
e persona aki, ora e tambe a cay na suela. Probablemente el
a kere cu el a mate tambe.
E acusado ta insisti cu e no sa con el a yega su cas. “Mi no
ta corda kico a pasa, pero si boso prueba cu ta ami a mata,
mi ta pidi disculpa,” el a bisa Hues ora cu esaki a puntr’e pa
detaye di e sucedido. E arma, un “voltmeter” di punta fini,
a wordo haya den su auto na sanger. E herida di 15 CM cu
e victima a ricibi den pecho ta cuadro cu e punta di e arma.
Famianan no tabata interesa pa haci un demanda di daño y
perhuicio ya cu esey no ta trece nan ser keri bek, pero si a
pidi pa e paga e gastonan di entiero. ’Mi kier mi ruman bek
y mi mama kier su yiu. Pero esey no por. Placa no ta kita nos
dolor,’ e ruman muhe a bisa den Corte. “E mester haya e
castigo di mas pisa cu por,” e mama a bisa despues pafo di
Corte, rondona pa amistadnan, ya cu nan mes ta un famia
chikito di tres persona so y cu awo ta di dos persona.
OM a pidi 15 aña y dia 14 di juni tin sentencia.