Page 33 - MIN SJA 9 APRIL 2016

E importancia di un contrato laboral

Friday, 08 April 2016 18:08

Comparti

Un gran parti di nos poblacion ta trahando riba nos mercado laboral caminda nan ta gana nan pan di
cada dia pa por mantene nan mes y nan famia.
Mirando cu un trahador ta den un relacion herarkico cu su dunador di trabou, ta importante pa e ta na
altura di e leynan laboral cu ta proteha como trahador como tambe e mester sa kico ta su derechonan y
obligacionnan.
Den cuadro di Expo Labor 2016 tumando luga dia 23 di april proximo, Ministerio di Asuntonan Social,
Labor y Hubent, drs. Paul Croes ta comparti algun di e informacionnan cu ta sumamente importante pa
cada trahador riba nos isla ta na altura di dje.
Ley ta conoce varios tipo di combenio pa haci trabou. Esun di mas importante ta e contrato laboral.
Kico ta un contrato laboral?
Un contrato laboral ta un contrato unda un partido, e trahador, ta pone su mes den servicio di otro
partido, e dunador di trabou, pa traha contra pago di salario durante cierto oranan. Pues e 3
elementonan principal di un contrato laboral ta: 1. Pago di salario, 2. Obligacion pa realisa trabou
personalmente 3. Relacion di autoridad (‘ta den servicio di’).
E contrato laboral tin forma liber, esey kier men cu e por wordo cera na forma verbal como por escrito.
Den e contrato laboral partidonan ta combini e condicionnan di trabou manera dianan y orario di trabou,
salario, funcion etc.
Pakico ta importante pa determina cu un trahador ta traha a base di un contrato laboral?
Solamente un trahador cu ta traha bou di un contrato laboral ta wordo protehi dor di e leynan laboral. E
trahador tin derecho riba p.e. un salario di por lo menos e salario minimo, minimo cantidad di dianan di
vakantie, e derecho riba pago di salario durante enfermedad of accidente. E trahador tambe ta wordo
protehi dor di e ley di retiro pues un dunador di trabou mester cumpli cu tur e rekisitonan di e ley di
retiro como tambe e Codigo Civil pa por retira un trahador for di trabou.
Si como trahador bo kier amplia bo conocimento riba e leynan laboral, bo ta wordo cordialmente invita
pa bishita nos Expo Labor 2016, cual lo tuma lugar diasabra 23 april 2016 na Renaissance Convention
Center di 10:00 am pa 9:00 pm caminda Departamento di Labor & Investigacion lo duna un lectura cu ta
hiba como tema: Leynan Laboral; derechonan y obligacionnan di un trahador. Entrada ta completamente
gratis!

http://www.24ora.com/local-mainmenu-5/107296-e-importancia-di-un-contrato-laboral