Page 18 - MIN ECUE

Ademas di e bienestar economico, e volumen halto di turista ta trece cu n’e tambe mas
trafico di persona, specialmente den centro di ciudad.

Pa tal motibo, Aruba Tourism Authority ta comparti cu comunidad en general, e dianan cu
nos isla lo ta mas bishita pa barco crucero. Di e manera aki ta busca pa tur hende ta bon
informa y prepara pa cu e aglomeracion, cu por causa trafico en general mas slow cu
normal. Dianan riba cual tin tres barco crucero of mas na Aruba, facilmente lo por haya riba
10 mil turista canando rond di nos capital, pero tambe nan ta bishita nos beach y ta bay
riba tour pa conoce otro partinan di nos isla.

Mario Arends, Cruise Manager pa Aruba Tourism Authority ta splica cu via media social y
otro medionan di comunicacion ta informa nos comunidad pa haci e preparacion debi y
brinda un experiencia mas positivo posibel na nos bishitantenan crucero.

“E aña aki ta proyecta pa nos yega 770 mil pasahero en total, cual ta un crecemento di 16%
den pasaheronan crucero compara cu aña 2016. Pa otro aña ta premira cu lo surpasa 800
mil pasahero crucero.”

“E volumen sigur ta importante pasobra tin hopi compania y hende ta depende di esaki
[industria crucero]. E otro parti ta e impacto economico cu e turistanan aki ta laga atras, cu
pa 2017 esaki ta proyecta pa un minimo di US$ 85.5 miyon.” asina Arends a duna di
conoce.

A splica ademas cu e horcannan pisa di e aña aki na norte di Caribe a pone cu a haya
pasahero adicional riba diferente barconan crucero.

Arends: “Esey a percura pa tin algun dia mas druk di loke nos a anticipa, pero ta un
fortalesa pa nos ecomonia. Nos ta continua cu diferente reunion, manera cu Cruise Action
Task Force, riba base operacional pa sigura cu nos ta haci miho preparacion posibel y
naturalmente en cooperacion cu Aruba Ports Authority pa asina conhuntamente percura pa
un miho trabou posibel.”

Akibao ta un lista di e fechanan caminda e waf di Aruba lo registra un cantidad grandi di
barconan crucero:

Oct 25: Adventure of the Seas, Nieuw Amsterdam y Monarch

Nov 8: MS Seven Seas Navigator, Zuiderdam, Coral Princess y Royal Princess

Nov 14: Britannia, Coral Princess y Monarch