Page 6 - MIN ON 2 dec,2015

AWEMainta Diaranson, 02 December 2015 11

Prome Minister
Mike Eman
entrevista
pa Korean
Broadcasting
System

Documentario riba Aruba ta
wordo estrena dia 4 y 5 di
december awor

SIMAN pasa dos periodista di Sur Korea, staciona na

Washington DC como corespondente p’e compania
‘KBS’, Korean Broadcasting System, a bin Aruba pa
entrevista algun hende pa traha un documentario di
Aruba. Loke a atrae nan pa bin Aruba ta vision 2020 di
Prome Minister Mike Eman y tur e desaroyonan ‘berde’
cu tin andando riba nos isla.

E periodista Yoo Han Park y su camarografo Jinkyung
Park a haci entrevista cu dirigencia di WEB, di
Universidad di Aruba, TNO, Zona Liber y otro
companianan cu ta envolvi den energia renobabel y
economia di Aruba basa riba e tema aki.
Mirando cu Sur Korea ta conoci pa su productonan
manera Samsung, KIA y Hyundai, lo ta hopi bon si nan
dicidi pa establece un hub aki na Aruba.
E isla ta hopi avansa caba riba e tereno aki y e
infrastructura tey.

E entrevista cu Prome Minister tabata enfoca riba e
vision berde di Aruba. Kico tur a haci caba, kico falta
pa haci y con kier logra yega na 100% di energia
renobabel.
Prome Minister Eman ta conoci pa su forma diligente
di papia y sigur den e caso specifico aki cu ta su pasion,
e por a duna un splicacion amplio y masha al caso di
kico tur Aruba ta para p’e y kico tur a haci caba.
E periodista Yoo Han Park a splica Prome Minister
Eman cu nan a bin Aruba pa traha e documentario,
pasobra cu e posicion di Aruba den mundo y e meta
ambicioso di Gobierno a hala nan atencion.

Eman a gradici nan pa nan atencion y a mustra nan cu
Aruba tin biento, solo y awa di lama na abundancia.
Fuentenan natural cu bo mester haci uzo di nan na e
mihor forma posibel.
KBS tin un audiencia di 56 miyon di hende, tanto
na Sur Korea como na otro parti di mundo unda tin
Koreanonan ta biba. E documentario riba Aruba sin
duda ta bay atrae mas turista ainda pa Aruba. Aruba,
isla chikito, conoci tur rond di mundo.