Page 7 - ATA

A4

LOCALDialuna 31 Augustus 2015

Violencia no ta yuda pa nada

Violencia no ta alternativa ni solucion pa nada. Esey a wordo demostra atrobe diahuebs pasa,
ora cu rabia y frustracion pa e ley di supervision financiero aproba den Parlamento, a tuma
over. Pa mas cu un persona por ta contra pa yega na introduci un ley asina, mester comprende cu
esey no ta hustificacion pa haci daño na propiedad, ni di otro ciudadano, ni tampoco na propie-
dad publico. E edificio ey no ta di e partido den gobierno, e ta propiedad di nos tur.
Hopi aña pasa, den añanan nobenta, durante un di e demostracionnan grandi dilanti Bestuur-
skantoor a yega un momento di tension grandi. Un cantidad limita di polis tabata pega entre
e multitud cu tabata pusha pa drenta, y e entrada principal di e edificio cu tabata cera. Lider
di oposicion Nelson Oduber a interveni pa preveni pio bisando cu ‘no ta bay kibra nada aki,
pasobra esaki (e edificio) no ta di nan, e ta di nos.’ E multitud a respeta su palabranan y e
demostracion a sigui, pero sin mayor hecho di violencia.
E rabia colectivo di un gran parti di poblacion e tempo ey no a sigui den violencia pero a hiba
na e victoria electoral grandi di oposicion na 2001. Loke tabata conta e tempo ey, ta conta awe
tambe. E propiedad ey cu mester drecha ta placa di nos impuesto ta bay drech’e. De paso, el a
crea un escenario di publicidad pa Prome Ministro haci un peticion na su partidarionan pa nan
bin yuda drecha e luga. Oportunamente el a haci uzo di esey.
Miedo pa turismo
Hopi biaha ora un accion di malcontento yega na un demostracion dilanti Bestuurskantoor, o
algun otro luga, nos ta tende e comentario di tur banda cu nos mester cuida nos pan colectivo,
esta turismo. Ta berdad cu disturbio grandi den un pais cu ta biba di turismo por tin consecuen-
cia grandi pa economia, pero tin un par di cos di considera aki:
1. Turismo no ta kita nada di e derecho fundamental di e ciudadano pa demostra su mal-
contento, semper cu esaki ta tuma luga dentro di margen di ley. Y ta surpasa margen di ley ora
violencia y destruccion di propiedad aheno ta tuma luga;
2. Prome cu considera turismo, nos mester ta consciente di e echo cu den un pais civilisa,
cu ta respeta su mes, no tin luga pa violencia. Esey ta conta den caso individual, tanto pa vio-
lencia delincuente pero tambe di autoridad arma contra ciudadano indefenso. E ta conta tambe
pa violencia colectivo, pa cualkier motibo y organisa pa cualkier organisacion o movemento.
3. Ora cu cierto ciudadano(nan) o organisacion ta bay demostra contra un accion o deci-
sion di gobierno, e gobierno ey como responsabel pa orden y siguridad publico mester abstene
su mes completamente di organisa su simpatisantenan pa bay contra e demostrantenan. Si e
principio aki no ta ser respeta, anto gobierno, y e Prome Ministro di turno cu ta e responsabel
maximo pa orden y siguridad publico, ta violando un di e principionan mas basico di nos de-
mocracia: cu autoridad no por ta fomenta violencia contra su ciudadanonan.
4.
Sin cu na ningun momento kier hustifica e accion di siman pasa, nos lo kier recorda nos ciu-
dadanonan riba e echonan di un aña pasa, unda esun cu tabata e maximo autoridad pa orden
y siguridad publico a haya ta bon pa otorga su mes e ‘derecho di demostracion’ cu e no tabatin
y no por tin pa ley, pa arma ofensa, menasa y violencia contra representante di Rey na Aruba.
Su accion a ser tolera pa un siman largo te ora cu autoridadnan di Reino a bisa ta basta y el a
hay’e obliga di stop su accion di protesta de inmediato.
Pakico ta trece e ehemplo ey di aña pasa dilanti? Pasobra mas di un biaha nos ta confronta
cu e realidad cu ni nos autoridadnan bon studia den tur regla di ley ta consciente di e enorme
responsabilidad cu e ofishi publico ta pone riba nan, loke innecesariamente por hiba nos na
situacionnan peligroso, no solamente pa turismo, sino na prome luga pa nos mes.
Pa bin bek riba e asunto mes cu a hiba na e disturbionan di siman pasa: cuanto disturbio por
tabatin pafo, no lo a stroba e ley di pasa. Ta gobierno di Reino a ofrece gabinete Eman e salida
di ‘scapa cara’ aki hincando e asunto den un ley di Aruba. Sino, lo nos tabatin un supervision
di Reino imponi via un Algemene Maatregel van Rijksbetuur hopi dia caba.
Si esey lo a bin, ningun di nos lo por a par’e tampoco. Oposicion politico mester concentra nan
mes riba e medionan legal na nan disposicion y no laga violencia kita atencion for di e asunto
principal mes: nos lo mester bay paga pa e saneamento financiero di Pais Aruba.