Page 7 - bon-dia-aruba-20210114

a7
local Diahuebs 14 Januari 2021
Segun minister di Husticia, Andin Bikker

Team huridico limita y otro retonan ta causa tardansa riba LOB-verzoek

E experiencia cu ciudadanonan a pasa aden pa atende
nan solicitud via un Landsverordening Openbaarheid
van Bestuur (LOB), a bira uno frustrante.

Esaki debi na e tardansa pa haya un contesta riba nan peticion.
Of tambe pa falta di informacion tocante nan inkietud riba
cierto maneho di gobierno, caminda nan kier haya mas trans-
parencia den cuadro di bon gobernacion.
Pa medio di un LOB-verzoek, cualkier ciudadano ta gosa di
e derecho di solicita cerca un instancia publico cu ta cay bao
un ministerio of cerca e minister mes, informacion of acceso
na cierto documentonan publico den cuadro di transparencia
riba su maneho y/of operacion di gobierno.
Dia 4 di januari ultimo, Bon Dia Aruba a relata e experiencia
di un colega cu su peticion di LOB-verzoek haci na minister
di Husticia a wordo ignora pa 18 luna. E colega su peticion ta-
bata encera entre otro informacion relaciona cu otorgamento
di peticion di asilo.

Otro experiencia cu e matutino aki a referi na dje dialuna ul-
timo tabata esun di e hoben politico di RAIZ, Ursell Arends
kende a yega di entrega varios LOB-verzoek, sin cu nan tur a
wordo honra of haya e debido atencion pa nan.

E tipo di experiencia aki ta mustra cu no tur minister ta cumpli
cu e ley aki; y tampoco nan no ta tuma un peticion di LOB
na serio.

Capacidad limita
Minister di Husticia, Andy Bikker a indica cu tin diferente
motibo cu tin di haci cu e tardansa aki. Den e LOB-verzoek
tin un termino di 3 siman pa duna un contesta. E por wordo
prolonga cu 3 siman mas pa atende cu e solicitud aki. Sinem-
bargo tin solicitud cu a tarda mas di e termino stipula den e
ley aki.

E mandatario a pidi dispensa pa e tardansa cu ta wordo pre-
senta cu e tipo di solicitud aki cu ta drenta den su ministerio.
Ya cu nan ta tarda mas di loke ta normal pa nan wordo atendi
debidamente.

Sinembargo e mandatario a laga sa cu e realidad di gobierno ta
cu nan ta conta cu un team huridico relativamente limita cu ta
atende cu diferente ley, entre nan e peticion di LOB.
Tambe el a argumenta cu reto nobo adicional a bin acerca cu
a pone presion extra riba nan desde 2018 cu e procedura di
asilo. Prome cu esey, Aruba no a conoce tanto solicitud di
asilo debi na e situacion interno di e pais bisiña di Venezuela.
Ademas for di maart ultimo Aruba ta confronta e reto di Co-
vid-19 cu ainda ta vigente.

"Tur esaki ta pone cu e por tarda, y tin biaha e ta tarda pa bo
haya e contesta," el a bisa.

E ta spera cu e proceso cu nan a cuminsa aworaki di e-Gover-
nance y tambe di por a haya mas persona pa atende cu e tipo
di solicitud aki, por yuda haci e proceso mas diligente. Tambe
e facilidad den e presupuesto pa reforsa y amplia e team di
hurista, no obstante e reto di CAFT y Covid. Segun e man-
datario nan ta purba haci nan maximo esfuerso, pero e ta keda
cu tin solicitud di LOB cu por tarda.

P'esey nan kier bin cu cambio riba e ley di Landsverordening
Administratieve Rechtspraak, LAR (Art 17 inciso 4) pa facilita
e proceso, ora cu un persona cu por ehempel a base di un
LOB-verzoek no ta haya e contesta. Mas lihe e por trece su
obhecion na atencion di LAR pa asina e proceso por bay mas
cortico.

Encuanto e tipo di contesta breve y sin argumento cu tin bi-
aha e solicitud di LOB ta haya, e mandatario a indica cu e
no tin un bista riba casonan particular. Pero regularmente e
ta den conferencia di prensa, y si den e caso aki, sin tin un
pregunta a base di transparencia riba maneho, e ta accesibel
pa contesta nan.