Page 33 - Awemainta
P. 33
AWEMainta Diabierna, 19 Februari 2016 33
Comite Olimpico
Arubano a organisa
curso pa Doping
Control Officer
RECIENTEMENTE Comite Olimpico Arubano, bou auspicio di World Anti-
Doping Agency (WADA) y e Regional Anti-Doping Organization (RADO), a
organisa pa tres dia largo un curso pa Doping Control Officers (DCO).
Actualmente COA tin dos DCO caba, pero e deseo semper a keda p’e Comision
Anti-Doping di COA tin un cuerpo di DCO mas amplio p’asina por haci mas
test di dopahe y tambe ofrece mas consientisacion riba e topico di dopahe den
deporte. Cu e curso aki COA kier logra desaroya mas DCO cual t’e personan
clave cu ta guia full e proceso di e test di dopahe.
E curso a wordo duna pa sra. Angelique Koolman kende ta un Lead DCO di
Comite Olimpico Arubano y tin amplio experiencia y conocimento riba tereno
di dopahe den deporte.
Despues di tres dia di curso, e participantenan mester a pasa un examen
teoretico como tambe uno practico pa despues di esaki, como un extra exigencia
di WADA, cada participante efectua un test di dopahe cu un atleta.
E test di dopahe aki mester a bay segun criterianan internacional, pues tabata
uno completamente oficial pa cual e samplenan lo wordo manda p’e laboratorio
oficial di WADA situa na Canada.
Na e curso Doping Control Officer a participa dos miembronan di comision
anti-doping di COA kendenan ta sra. Marla Thiel-Dominguez y O’Neil Romero.
Tambe tabatin dos representante di Corsou, sres. Ruthsel Martina y Edsel
Cominencia. Na final di e curso, Presidente di Comite Olimpico Arubano, sr.
Edwin Roos den presencia di sr. Patrick Werleman miembro di e Regional
Anti-Doping Organization a felicita e participantenan y alabes a entrega n’e
participantenan e certificadonan.
Finalmente sr. Edwin Roos a gradici sra. Angelique Koolman cu a bin Aruba
specialmente pa duna e curso aki y a entrege tambe un bunita certificado di
gradicimento.
Comite Olimpico Arubano ta felicita e participantenan cu nan bunita logro y
alabes ta felicita tambe sra. Angelique Koolman cu a haci un trabou excelente
como docente.
