Page 23 - MIN SOC

Kiwanis Club of Aruba ta cla pa e di 7 edicion di su Torneo
di Golf
Wednesday, 16 March 2016 12:54

Comparti

Kiwanis Club of Aruba ta contento di informa cu preparacionnan ta cla pa nan di 7 Torneo Annual di Golf.
Cu hopi orguyo ta anuncia tambe cu fondonan recauda cu e actividad aki ta destina na Fundacion Zinnia
cu ta trahando riba conscientisacion di e peliger di coremento bou influencia. Un biaha mas ta conta cu e
facilidadnan estupendo di The Links at Divi pa tene e torneo riba 20 di maart, esta diadomingo proximo.

E torneo di golf aki ta un di esnan mas spera den aña y ta goza di un popularidad enorme pa e ambiente
estupendo como tambe e premionan fabuloso. Ehempel di esaki ta e Mitsubishi Outlander completamente
nobo cu ta bay pa e persona cu por logra un ‘Hole In One’. Adicionalmente tin premio pa reparti entre e
categorianan di ‘Best Gross’, ‘Best Net’, ‘Closest to the Pin’ y ‘Longest Drive’. Hustamente teniendo na
cuenta e interes grandi pa participa, comision organisado a dicidi pa for di e aña aki expande e torneo cu
un round mas. Di e manera ey, e prome round lo ta mainta entre 8’or y 12’or y mey di merdia y e siguiente
ta cuminsa inmediatamente despues y ta bay te cu 5’or di atardi. Ambos round ta completamente yen
caba. E ceremonia di premiacion ta cuminsa pa 5’or di atardi na The Links at Divi mes y pa cortesia di
Tropical Bottling y Balashi. Kiwanis Club of Aruba ta gradici tur esnan cu a registra pa nan contribucion
na e actividad caritativo. Na esnan cu no a haya oportunidad e biaha aki, tambe ta gradici pa e boluntad y
ta conseha pa registra na tempo pa proximo aña. Tambe ta probecha pa gradici tur esnan cu ta haci e
evento posibel. Comision organisado y miembronan di club ta wak dilanti na un dia masha agradabel pa
diadomingo awo caminda cu, como resultado, hunto ta haci un aporte substancial na evita mas
desgracianan riba camindanan di Aruba pa motibo di coremento di auto bou influencia.

KIwanis Club of Aruba ta desea tur participante di e di 7 torneo annual di golf hopi exito! Kiwanis ta un
organisacion global di boluntario dedica na cambia mundo pa medio di cada mucha y cada comunidad y
tin como lema: Sirbiendo e muchanan di mundo. Kiwanis Club of Aruba ta activo den e comunidad
Arubano desde 1964. Pa mas informacion di Kiwanis Club of Aruba y/of su actividadnan, por acudi na
www.kiwansaruba.org. Tambe por bishita e website di Kiwanis Internacional na www.kiwanis.org.