Page 27 - MIN SOC

Minister dr. Paul Croes: Hobennan ban celebra nos Dia Nacional sin lubida su importante
historia y gran balor
Wednesday, 16 March 2016 17:20

Comparti

Minister di Asuntonan Social, Hubentud y Labor, dr. Paul Croes ta sinti hopi emocion di mira con Aruba a
yega na e celebracion di 30 aña di Status Aparte y 40 aña di Himno y Bandera.

E tin honor di comparti esaki cu tur e compatriotanan cu tambe lo ta marcando e ocasion importante na
Hulanda. Prome cu esey, e mandatario kier a comparti su palabra di pabien, pero tambe conscientisacion
na, particularmente, nos hobennan. Un dicho popular ta bisa cu si bo no conoce historia, bo ta condena pa
ripiti’e. Esey ta aplica den nos caso tambe. For di momento cu, como pueblo, nos a bisa cu nos mester di
nos propio bandera y otro simbolonan patrio, un movemento cu a keda ratifica diez aña despues pa e
Status Aparte, nos a crece enormemente como pais. “Cada un di nos hobennan, sea nace aki of cu a scoge
Aruba como nan hogar, mester conoce ta ken y con nos a yega na e estado autonomo cu nos conoce
awendia y mester conoce pakico tabata asina importante pa nos a logr’e,” Minister Croes a bisa. No
solamente den terminonan socio economico e posicion nobo den Reino a haci un diferencia; a demostra
tambe cu e Arubiano ta un luchador bon para den su sapato. Ta indispensabel pa e generacion hoben di
awendia sa di aprecia e curashi cu ta core den nos venanan; e mesun cu si un dia mester wordo poni na
prueba, nos lo ta cla pa demostra y bolbe defende nos derecho di propio determinacion.

Como pueblo nos a demostra di tin e madurez necesario pa por tuma mando di nos isla na nos mesun
encargo y Aruba a crece den diferente ramo y sector, te hasta resaltando na nivel internacional den algun
di nan. E motivacion aki pa sigui crece, pa ta e miho di bo mes y pa carga bo pais na halto, mester keda
guia nos cada dia y pa semper. “Personalmente mi ta invita tur hobennan di Aruba pa acudi na e diferente
manifestacionnan cultural, e Desfile Nacional y principalmente e celebracionnan den cada bario. Ban
comparti hunto e orguyo di ta Arubiano y di por determina e curso di nos propio destino; mescos cu cada
hoben tin e derecho di determina esun di dje cu tur e potencial cu su soño y aspiracionnan ta dun’e,”
Minister Croes a finalisa bisando.