Page 43 - min .on may 11,2015

MEP cu hopi critica sin sentido y sin presenta un solo mocion pa drecha
enseñanza

Publication: Monday, 11 May 2015. Categoria: General

Parlamentario Sr. Jeffrey Kelly:

ORANJESTAD (AAN): Parlamentario Jeffrey Kelly di fraccion di AVP ta mustra riba e falta di
seriedad cu fraccion di MEP a bin ta mustrando durante tratamento di presupuesto 2015 di pais
Aruba.

E aporte di MEP den Parlamento ta simplemente nulo y no por constata un liña di pensamento
concreto den nan presentacionnan na momento di trata presupuesto di diferente ministerio.

“Durante tur presupuesto cu nos a trata siman pasa den Parlamento, miembronan di fraccion di
MEP a sobresali pa nan falta di seriedad y incapacidad pa aporta algo positivo na desaroyo di nos
pais”

Mep no a presenta ni un mocion: Lider di MEP, E.W.C. na tur momento a camufla su
preocupacion den un bachi politico, atacando na tur momento, denunciando cosnan cu e mes no
ta kere aden y pa sorpresa di tur hende, lider di Mep y su fraccion no a presenta ni un solo
mocion cu lo ta un indicacion cu realmente nan kier a drecha algo na interes di pueblo di Aruba.

E lider di MEP por ehempel a cuestiona formalmente maneho di Minister di Enseñansa, a bay
riba hopi puntonan cu no tin nada di haber cu maneho general di enseñansa, a mustra su
preocupacion riba diferente asunto, pero na final di dia ora cu a caba cu tratamento di
presupuesto di ministerio di enseñansa, fraccion di MEP no a presenta ni un solo mocion pa
asina duna su aporte y tur hende compronde e vision di e fraccion geel pa cu enseñansa.

Pa lunanan largo e lider di MEP a ataca maneho di Minister di Enseñansa, a converti asuntonan
di school den confrontacion politico y ora cu tur hende a kere cu a base di e critica riba maneho
di Minister di Enseñansa, Michelle Hooijkboer Winklaar, lider di Mep y su fraccion ni sikiera
por a presenta un solo mocion pa asina duna un aporte real na desaroyo di educacion di nos
muchanan.

Contra diversificacion di enseñansa: Lider di MEP a mustra bon cla cu e ta contra di
diversificacion riba tereno di enseñansa, constantemente atacando entre otro Rietveld Academie
y demostrando cu e cuestionamento aki, un falta di conocemento di maneho di enseñansa
totalmente.

Lider di Mep na ningun momento a presenta un solo punto cu lo ta mustra algo riba
diversificacion y oportunidadnan adicional pa nos hobennan sigui specialisa nan mes den nan
propio pais.

El a tuma oranan largo pa papia di asuntonan cu no tin absolutamente nada di haci cu enseñansa
di nos pais y el a cay den un ripiticion di su campaña politico, tratando na cambia opinion di un
pueblo, cu ya den eleccion di 2013 a vocifera su opinion politico den un forma hopi amplio.

Nos ta lamenta e tipo di comportacion aki di e lider di MEP, kende no tin ningun vision riba
ningun ministerio cu nan presupuesto a worde trata caba, pero semper bay Evelyne cu e
insistencia pa plama discordia den su propio pueblo,” Parlamentario Jeffrey Kelly a trece dilanti.