Page 14 - AM211013

14 AWEMainta .com Diaranson, 13 October 2021
Invest Secure ta duna reconocemento

na su empleadonan fiel

Invest Secure a celebra su 25 aniversario. Durante un
celebracion a yama danki di curazon na comunidad completo
y sigur na nos empleadonan cu a sa di asisti nos clientenan na
un manera ehemplar y satisfactorio durante trayectoria.
Tabata na aña 1996 cu por medio di su Director, Louis
Richardson despues di a sirbi Reino den Servicio Militar pa
mas cu 26 aña a bin cu e idea di kier sigui duna servicio di
proteccion na nos comunidad Arubano.

Tabata un periodo bastante dificil cu loke nos tur a experiencia
cu tur nos retonan, incertidumbre y obstaculonan, sinembargo
despues di tur esaki, awor ta un momento pa para keto, refleha
y gradici na Dios pa loke el a haci pa cuida nos pa nos por
a yega asina leu. Durante e periodo aki tambe tabatin algun
empleado cu no tey mas cu nos, algun cu no ta den servicio
mas y of cu a fayece.
Durante nos actividad di gradicimento nos a tene tambe un
minut di silencio pa recorda nan contribuccion. E preparacion,
guia y supervision duna na nos empleadonan ta muestra cu e
conocemento ricibi tabata necesario pa brinda e servicio di
proteccion satisfactorio na tur nos clientenan.
Durante nos momento di celebracion a reconoce 12 empleado
ehemplar, pa nan añanan di servicio riba diferente tereno
di proteccion. Guard, Patrol, Basestation , Tecnico y Dept.
Administrativo. Esaki ta duna muestra tambe cu Invest Secure
ta brinda un servicio completo di proteccion y ta kere den e
abilidad di nan empleadonan.

Esnan cu a ricibi nan certificado di reconocemento y premio
adicional e aña aki tabata: 5 aña - J. Croes, J. Gomez, P. Hoek,
N. Laurore, H. Venner, J. Wefer, J. Moreno, S. Bridgewater. 10
aña - A. Chayadi, J. Vorst. 15 aña - D. Medina y F. Simmons.
Tur a wordo reconoci cu un certificado pa nan bon trabou y
perseverancia y cu a mustra stabilidad pa keda persevera na
un organisacion durante un tempo asina largo.

Invest Secure tambe ta evalua su empleadonan temporalmente
riba diferente topico y basa riba esey ta eligi tambe Empleado
di Kwartal y tin Empleado di Aña cu ta un estimulo hopi
motivante. Durante celebracion cu e empleadonan tabatin
seso-sport cu a wordo masha hopi gusta cu e preguntanan di
compania, di seguridad y con bon bo conoce bo isla. Despues
algun premio a wordo rifa entre e empleadonan presente. A
come algun pan cu e soppi y e tabata campeon.

Desde inicio te cu awe Invest Secure ta ofrece diferente
actividad hunto cu su empleadonan cu tambe ta yuda pa
aumenta e teamwork entre e coleganan. E.o. celebracion Dia
di Bandera, Dia di Mama y Dia di Tata, tambe Thanksgiving
pa yama danki n’e empleadonan pa bida y pa nos existencia.
Invest Secure ta hopi orguyoso di su empleadonan y sigur e
staf cu hunto ta forma parti di un organisacion durante tur e
añanan. T’e trahadornan t’e curason di e organisacion y esaki
nos ta balora masha hopi mes. Poniendo su empleadonan na
prome lugar, Invest Secure ta consciente y ta aprecia tur cu ta
percura pa proteccion di propiedad di nos clientenan.
Pues den nomber di e team completo di INVEST SECURE kier
a yama danki na comunidad di Aruba en general p’e sosten
durante tur e 25 añanan. Tambe danki na tur ex-empleado di
Invest Secure cu a duna nan aporte y sosten. Mas cu tur cos
Danki na DIOS pa bida y salud. Masha danki.