Page 36 - Min.Social 22 April'15

Minister Paul Croes a felicita nos atletanan campeon na nan
yegada na Aeropuerto

Tuesday, 21 April 2015 19:05
Comparti

Diadomingo anochi for di diferente pais nos atletanan hubenil a yega Aruba unda un gran cantidad di
famia, amigo, coleganan den presencia di Minister Hooyboer –Winklaar, presidente di parlamento drs.
Marisol Lopez Tromp y Minister di Asuntonan Social & Hubentud drs. Paul Croes a recibi nan.
E prome avion a trece nos damanan hoben futbolista cu a sali campeon na Corsow den weekend, aki nan
a laga un record di goal atras. Tambe e team di volleyball a sa di saca cara di nos isla aya na Curacao.
Hunto cu su colega Hooyboer, Minister Paul Croes a felicita cada un di nan pa e logro aki. Net nan tras a
yega e delegacion cu a permanece 21 dia den exterior pero cu a yega cas satisfecho cu un record den
medayanan. Tabata un momento di hubilo y orguyo ora cu e avionan a aterisa casi pareu pa asina nos
muchanan deportista drenta e VIP room cu un sonrisa grandi, mannan yena cu copa y medayanan cu a
demostra nan talento den deporte. “Hopi animo, entusiasmo y alegria paso nos hoben atletanan a
destaca. Aruba su nomber un bes mas a resalta entre paisnan grandi. Momento cu mi ta wak back na un
par di simanan atras durante e anochi di Excelencia den Deporte, mi a bisa cu ora hobenan hasi algo
negativo esaki ta haya tur atencion y frontpage. Pero awo ta toca turno pa dunanan frontpage pa e logro
importante aki. Nos hobenan a saca cara di nos pais y henter nos isla ta para tras di boso”, tabata
palabranan di Minister Paul Croes.
No menos 45 medaya den landamento y 23 goal den futbol, esakinan ta parti di e logronan. Minister
Croes a bisa; “ Nos ta orguyoso di boso, Aruba ta orguyoso di boso. Boso kibra record den varios
competencia y a demonstra cu boso ta lider den locual boso ta hasi”. E delegacion aki a kibra varios

record y e resalta den paisnan grandi.

http://www.24ora.com/politica-mainmenu-18/94365-minister-paul-croes-a-felicita-nos-atletanan-
campeon-na-nan-yegada-na-aeropuerto