Page 10 - DVG

ORANJESTAD (AAN) – Jurette Croes, vocero di Departamento di Salud Publico (DVG),
den entrevista cu DIARIO, ta haci un yamada na comunidad pa coopera y tene limpi
rond di cas, pasobra tin hopi criadero di sangura.

No obstante cu ta suppose cu e temporada di yobida a pasa, tin algun yobida aki aya, y
mester tene cuenta cune.

Departamento di Control di Muskita Geel, (GKMB) ora cu haci control den casnan rond

di Aruba ta hayando hopi criadero. Sra. Croes a subraya cu esaki ta hopi alarmante,
pasobra apesar cu Departamento di Salud a bin cu hopi campaña DVG ta ripara cu e
mensahe no ta yegando, of e ta yega pero comunidad no ta tuma nota di esaki. E ta
pidi pueblo pa haci rond di cas limpi, y deshaci di criaderonan.

E motibo pa sigui cu e campaña aki ta pa evita cu por surgi un brote di dengue, manera
a sosode den pasado caba. Ora cu a caba di yobe pa controla rond di e cas pa wak unda
awa a keda para.

Seccion GKMB ta controla cas pa cas, y pa educa e comunidad nan ta mustra nan unda
por localiza e criaderonan, pero na momento cu GKMB sali for di nan cas, ta keda na
cada persona pa controla rond di nan cas.

Den e ultimo reunion cu DVG tabata tin cu e grupo cu ta combati sangura, cu yama
Fact Team por a constata cu e malesanan ta relativamente abao, pero esey no kiermen
cu tin cu laga esaki bay.

Jurette Croes a subraya cu na momento cu tin hopi sangura adulto bulando, y e
malesanan cuminza lanta cabes, hopi lihe ta surgi un brote.

Pues, mester deshaci di e criaderonan pa por reduci e cantidad di sanguranan adulto cu
ta bula rond y cu por transmiti e malesa di un persona pa otro.

GKMB a haci un alerta cu e cantidad di criaderonan ta alarmante.

https://www.diario.aw/2019/12/dvg-ta-alerta-comunidad-cu-cantidad-di-criadero-ta-alarmante-y-ta-
pidi-cooperacion/