Page 6 - DVG

Apesar Cu GKMB Ta Encontrando Hopi Criadero Na

Cas – Spuitmento Den Bario Ta Ultimo Recurso

 Local

- 03/12/2019

Redaccion di AWEMainta a wordo aserca pa sa kico por t’e motibo cu Gele Koorts
Muskieten Bestrijding (GKMB) no a cuminsa cu e campaña di pasa spuit den bario pa
combati e sanguranan cu ta haci hopi hende malo, ultimo dianan.

Nos a dicidi di tuma contacto cu vocero di Departamento di Salud Publico, kende a duna
di conoce berdad cu tur aña di nobo ta recorda comunidad atrabez di nan campañanan di
concientisacion riba e peligernan di malesanan transmiti pa sangura y tambe kico cada
uno di nos mester haci pa contribui na reduci e risico.

T’asina cu ultimo lunanan hopi awa a yobe na Aruba y esaki ta hisa e posibilidad pa un
aumento den casonan di Zika, Dengue y Chikungunya.

Seccion di GKMB ta yuda den e tarea di combati e sangura dor di pasa cas pa cas
controla, señala y educa cada individuo con pa controla rond di nan cas y con pa cuida
awanan para cu tin uzo domestico pa nan.

Tur e trabou aki GKMB su team ta haci pa na momento cu awa yobe cada persona sa con
pa controla rond di nan cas y sa tambe kico pa haci y dicon.