Page 7 - DVG

Lamentablemente seccion di GKMB a constata y ta encontrando masha hopi criadero
mes rond di e casnan cu nan ta bishitando.

Esaki ta un peliger grandi cu por ocaciona brote of hasta epidemia mes di malesanan
transmiti pa sangura si hunto como un comunidad nos no tuma accion y deshaci di tur
material cu por mantene awa manera hemchi, taira, bari, cosnan di hunga di e muchanan,
tapadera, scoter di mata y mas.

N’e momento aki cifranan di malesanan transmiti pa sangura ta relativamente abou, danki
Dios, pero esey no nifica cu nos tin pa warda te ora baca hoga pa nos tuma accion.
Departamento di Salud Publico di Aruba ta haci un yamada na comunidad pa tuma accion
y controla rond di nos casnan enbusca di criaderonan di sangura y deshaci di esakinan.

Seccion di GKMB su so no por atende cu e problematica aki, nos mester ayudo di
comunidad.

Encuanto e remarke, pakico no a cuminsa cu e campaña di pasa spuit den e barionan, e
vocero di DVG a duna di conoce, cu esaki t’e ultimo recurso. Si cuminsa spuit awor, e
sanguranan ta bira inmune y e veneno cu ta spuit no ta haci nan nada mas.

Ta cada uno di nos, mester yuda den concientisacion di pueblo, y manera señala yuda
controla rond di cas, pa elimina e criaderonan cu por tin.

Si nos tur haci dicho control, nos por evita un brote of hasta epidemia di malesa, cu
ningun di nos no kier pa ningun hende.

Pa mas informacion por tuma contacto cu seccion di GKMB di Departamento di Salud
Publico na 522-4200 y like nos Facebook page Directie Volksgezondheid Aruba pa keda
bon informa.