Page 95 - MI TTC 14 SEPT 2015

Di cada dos florin den parkeermeter, un florin ta bai pa esnan rond di Otmar
Oduber

Publication: Monday, 14 September 2015. Categoria: Politica

MEP ta denuncia escandalo di huur di Aruparking for di primo di Minister

ORANJESTAD (AAN): Segun Partido MEP, Aruparking ta e escandalo mas grandi di
gabinete Mike Eman. No solamente Otmar Oduber tin e trahadornan riba payrol pa casi un aña
caba sin hasi nada, pa paga fabornan necesario. Sino tambe el a nombra henter su team di
campaña den e board di Aruparking.

Pa colmo hendenan ta puntra nan mes ta di cual amiguito Otmar Oduber a cumpra e machinnan
di parkeermeter, pasobra nan ta masha antiqua. Awendia, si di berdad bo kier a cumpra
machinnan drechi, bo ta haya machin cu ta traha cu bo debit card di banco, of ta dunabo placa
bek. Pero e machinnan cu Aruparking a trese ta parse cos cu na un otro pais nan a benta afo. Ken
sa ta ken mester a wordo privilegia atrobe.

Pero locual a causa mas rabia ta e hecho cu Aruparking no por a haya ningun otro lugar di huur
nan oficina, pero mester a huur na edificio di primo di e minister.

Net Otmar Oduber cu a demonisa huurmento di edificio tempo di MEP ta bin y hasi mucho peor.
Pa cuminsa Otmar Oduber a nombra tur su famianan den gobierno. su omo, su primo, su prima,
y ta duna nan promocionnan barbaro! Ademas Otmar ta huur edificio di su tanchi, mientras e
edficio a wordo afgekeurd. Otmar ta huur e edificio di otro primo pa un scol, mientras cu e ta
totalmente inadecua pa duna les. Y awor, di tanto edificio cu tin den Playa, ta net esun di su
primo e mester a huur?

Ta ken por kere Otmar Oduber mas. Su credibilidad a zak te vloer. Esaki ta confirma un biaha
mas: di cada dos florin den e parkeermeternan, un florin ta bai pa esnan rond di e minister,
partido MEP a indica.