Page 13 - AM211016

Diasabra, 16 October 2021 AWEMainta.com 13

Drs. Mervin Wyatt-Ras (AVP):

Ta inacceptable cu gobierno kier

tuma medida riba famianan di criansa

Parlamentario drs. Mervin Wyatt-Ras den un entrevista a trece padilanti
cu ta inacceptable cu gobierno ta tuma medida riba famianan di criansa.
Wyatt-Ras por a tuma nota di un articulo den medio di comunicacion cu

Departamento pa Asuntonan Social ta informa cu personanan cu tabata
haya “pleegkinduitkering” no ta haya e ayudo financiero extra mas cu’n
persona normal den bijstand ta haya ora ta bai scol regular durante dia.

E Departamento a informa alabes cu pa algun aña caba e Seccion di Bijstand
no tabata ehecuta articulo 7 a. di Bijstand corectamente y cu desde aña
pasa nan a “trek recht” e articulo aki y ehecucion di dje. E 250 florin extra
cu esnan cu tin yiunan di criansa tabata ricibi ta e “schooltoelage” y nan
a hay’e te cu 9 di september 2021. Pues e mayornan di criansa lo haya
solamente 200 florin pa nan yiunan di criansa, enbes di 450 florin.

Segun Wyatt-Ras netamente den e periodo aki cu un cantidad di nos
ciudadanonan tin’e dificil y a perde trabou di cual tin diferente no ta haya
un Bijstand y pues no ta cai bao di e articulo 7a. ta bin cu un medida asina
riba lomba di e mayornan cu tin consecuencia riba e muchanan. Muchanan
cu bira un “pleegkind” ta muchanan cu no por biba serca nan mayor
biologico pa motibo di un of otro problema na cas, manera p.e. descuido,
abuso, maltrato y adiccion, y tin di nan tin diferente dificultadnan of
retonan psycho-social y/of di comportacion dor di cual ta rekeri pasenshi,
dedicacion y hasta guia tanto di e mucha como di e mayornan di criansa.

Ademas tin di e muchanan cu ta den un famia di criansa mester di ayudo
special pa cu nan siñamento.
Un ayudo of sosten financiero pa e mayornan di criansa no solamente ta
haci posibel cu e yiu di criansa por haya mas oportunidad sino alabes cu e
por ta un incentivo pa famianan cu no tin mucho entrada por tuma e stap di
duna un mucha un oportunidad di biba den nan famia y haya amor, calor,
cariño, proteccion y educacion cu e mucha no por haya den su propio famia.
Net awor cu salud mental di nos muchanan y adultonan ta delicado, enbista
di COVID-19 y su consecuencianan riba relacionnan familiar, gobierno ta
tuma e decision di corta den nos muchanan vulnerable y nan mayornan di
criansa.

Wyatt-Ras a ser aserca dor di diferente mayor cu no ta contento y ta hasta
desespera y ta haya cu gobierno no por sigui cu tal decision descabeya cu
sigur lo perhudica especialmente muchanan cu ya caba ta vulnerabel.

E Parlamentario a manda diferente pregunta pa e minister y ta spera di haya
contesta pronto. El a puntra si e Minister por informa Parlamento dicon
of kico ta e motibonan cu awor cu un cantidad di famia a perde trabou ta
corta of tuma medida den e grupo di mucha aki cu por ser considera como
vulnerabel den nos comunidad? El a puntra cuanto famia ta bin na remarca

pa e yudansa aki y ki suma esaki ta encera? A puntra si a skucha opinion di
departamentonan/instancianan encarga cu famia di criansa pa sa ki ta nan
opinion al respecto? Cual tabata e resultado di e consulta?
E fondo di Crisis (Crisisfonds) a ser aproba cu e meta pa yuda y sostene
muchanan den situacion vulnerabel, manera entre otro negligencia, abuso
y maltrato. Wyatt-Ras ta puntra y cuestiona dicon e fondo aki no ta yuda
den e caso aki? Con “Crisisfonds” por yuda pa evita cu ta tuma e medida
inhusto y inhumano aki?
Parlamentario Wyatt-Ras ta spera cu e minister en cuestion por tuma e
decision corecto y no perhudica e famianan aki cu di bon boluntad kier
yuda un mucha y dun’e un segundo oportunidad.