Page 15 - AM211016

Diasabra, 16 October 2021 AWEMainta.com 15

Women’s Club of Aruba a recorda

y celebra su di 87 Aniversario

Women’s Club of Aruba (WCA) ta un organisacion

non profit y multifacetico cu ta dedica su mes na

mehoracion di comunidad. El a ser funda riba 17 di
september 1934 pa señora Lucy Smith, esposa di Lloyd

G. Smith, kende tabata presidente di Refineria di Lago

Oil & Tranport Company di e tempo ey. Esey a haci cu
na september ultimo, WCA a recorda y celebra su di 87

aniversario na Elliotti’s restaurant durante un reunion
general pa miembronan hunto cu nan invitadonan.

Tabata reina un ambiente hopi ameno y musica tabata

na encargo di e canta autor, e gran musico, Robert
Thiel.

Ta durante di e reunion aki tambe, WCA a reconoce
Ludwina Vis-Kock y Lilla Williams como Life Member.

Ludwina Vis-Kock ta un miembro desde 1980 y aunke
e ta un store manager hopi ocupa cu dos yiu homber,

e tabata saca tempo pa haci trabou di boluntario, te

ora cu su esposo stima a fayece y hopi responsabilidad
a bin cay riba dje. Su tempo a bira limita, pero toch

semper e tabata para cla pa yuda cu proyectonan pa

recauda fondo, premio pa diferente actividad y cada
aña regalo special pa Student Awards. Nos di WCA

ta desea di gradici Ludwina masha, pa su apoyo di
semper na club.

Lilla Williams a bira miembro na 1991 y pa 30 aña
el a duna hopi di su parti como boluntario pa yuda

club. Pa varios aña, el a forma parti di comision di
Welfare, demostrando asina su amor y pasion pa nos

grandinan. Tambe Lilla a traha den comision di Dress

a Child, Medio Ambiente goes to School y varios otro
comision cu un berdadero curason di boluntario. Lilla

ta atende su reunionnan general cu hopi animo y ta

un placer pa semper mira con elegantemente sexy e ta
den vestuarionan cu e mes ta cose, dependiendo di e

tema cu e comision di Program ta bin cu ne.

Na e ocasión aki, presidente Norma Brinkenberg a

entrega cada Life Member un bunita bouquet di flor
y nan certificado di reconocimento. Un biaha mas

WCA ta manda un caluroso pabien pa e dos damanan

elegante aki!