Page 12 - AM250203
P. 12
12 LOCAL AWEMainta Dialuna, 3 Februari 2025
Szabo ta pidi pa prepara pa futuro despues di Landspakketten
E secretario di Estado di Relacionnan di Reino, Zsolt Szabo
(PVV), ta considera cu a logra avance significativo cu
Landspakketten, e acuerdonan entre Hulanda y e paisnan di
Caribe Hulandes pa impulsa reforma structural.
Fuera di esey, e ta destaca e respaldo di e islanan den e
lucha contra corupcion y ta anuncia cu Boneiro lo ricibi 13
miyon di euro den cuadro di e Regio Deal.
E declaracionnan aki a wordo haci durante un sesion digital
di Q&A cu e medionan Caribense, despues di e reunion cu
e Conseho di Minister di Reino dia 31 di januari. Szabo a
expresa su satisfaccion cu e avance observa rib'e islanan,
aunke el a reconoce cu algun proceso lo por avansa cu
mayor rapidez.
E secretario di Estado a subraya e importancia di planifica
e periodo posterior n'e Landspakketten, cu lo finalisa na
2027. N'e momento ey, e organisacion temporal (TWO), cu
ta brinda sosten fo'i Hulanda, lo stop di opera. P'esey, ta
considera fundamental determina cu e medidanan lo mester
mantene y cu e recursonan lo ta necesario pa garantisa su
implementacion.
"E lo ta un eror cu e plannan desaroya no por ehecuta pa
falta di capacidad," el a adverti.
Szabo tambe a atende e reciente mocion den
Tweede Kamer, impulsa pa Aukje de Vries (VVD),
cu ta pidi un mayor presion riba e gobiernonan
Caribense pa combati corupcion.
E medida a surgi despues di e detencion di e
parlamentario Michelangelo "Lo" Martines,
sospechoso di narcotrafico y otro condena di
funcionario rib'e islanan.
Segun Szabo, e gobiernonan di Caribe Hulandes
ta respalda nan esfuersonan y a mantene reunion
cu dos di e prome ministernan, cu plan di dialoga
pronto cu esun di Corsou.
Por ultimo, el a indica cu e 66 miyon di euro
destina n'e reparacion di e pasado esclavista lo
por ta uza pa impulsa e economia y mehora e
salud rib'e islanan.
Fuera di esey el a destaca e plannan di Boneiro
pa investi den e infrastructura y sostenibilidad
cu e fondonan di Regio Deal den colaboracion cu
Hulanda.
