Page 6 - awe jun 2

6 AWEMainta Diahuebs, 2 Juli 2015

Atrobe ta pa kima sushi pa loco

Cuerpo di Bombero a atende mas di
60 candela riba Dia di Dera Gay

TUR aña riba dia 24 di juni tin personanan cu ta probecha

di e fiesta di Dera Gay (Dia di San Juan) pa kima yerba
y sushi di cura, tanten cu e celebracion cultural mes ta
ensera otro cos, esta e kimamento di e resto di cosecha.
Como cu ta tolera e practica di kima sushi di cura,
Cuerpo di Bombero y Rescate Aruba tur aña ta prepara
di antemano p’e dia aki, cu extra material como tambe
personal na tur tres kazerne.
A inclui entre otro un pickup n’e kazerne situa na
Aeropuerto pa tin cobertura extra y sali cu mas flexibilidad.

E aña aki tabata hopi druk y e prome melding a drenta
caba alrededor di 3:30pm, cual ta mas tempran di loke
ta custumbra cune di otro añanan, asina ing. Edward de
Cuba, Comandante di Cuerp di Bombero y Rescate Aruba
a splica.
Na tur Brandweer a ricibi entre 60 pa 65 melding, di
cual 48 tabata candelanan cu tabata forma peliger pa
propiedadnan di hende y como tal a rekeri atencion
urgente.
E meldingnan a sigui te cu 5:00am di e siguiente mainta,
esta dia 25 di juni y tur e kazernenan di Brandweer tabata
activo, cu mas material y personal cu normal.

Comandante de Cuba a splica cu e candela mas grandi
tabata na Sabana Basora. Brandweer mester a regresa
diferente biaha pa atende cune como cu e tabata un poco
complica.
El a agrega cu asina hopi melding Brandweer no por pasa
mucho tempo riba cada candela, pasobra tabatin mas
melding na mesun momento y nan tabata zorg p’e area
ta sigur, cu bida humano y casnan y edificionan for di
peliger, pa por sigui p’e siguiente melding.

Brandweer ta “kijk door de vingers” pa cu e candelanan
di sushi, como cu ta tolera e practica, pero ta pidi na mes
momento pa comunidad ta mas consciente di con nan ta
kima sushi den nan cura.
Un simpel conseho cu Brandweer ta ripiti tur aña p’esnan
cu kier kima sushi di cura, ta pa por fabor chapi e cura
prome cu cende e yerba na candela.
Un otro factor, mas importante ainda, segun de Cuba ta
remarca, t’e esencia p’esun cu tin intencion di bay kima
sushi pa tene cuenta cu bisiña, cu hende grandi, mucha
y hendenan cu por tin problema di salud.

Candela y huma ta un molester, pero n’e persona cu
un problema di salud e por causa hopi daño, hasta cu
resultado fatal, Edward de Cuba a subraya.
Tene cuenta cu esaki, pasobra loke por ta un celebracion
pa un grupo por tin consecuencianan malo of hasta grave
pa otro. Pensa riba bo prohimo cu ta banda di bo, el a
finalisa bisando.