Page 63 - AVP

“Na 2018 y 2019 nos a presenta den e presupuestonan respectivo nos puntonan di
maneho conciso y amplio, caminda nos a describi kico ta e maneho di ministerio di
Husticia y cu ta refleha claro e acuerdo di gobernacion”.

“Aworaki mi por constata cu orguyo cu nos ta ‘on target’ cu e puntonan di maneho
aproba pa Parlamento”.

Esaki segun Bikker, kende a menciona algun di e puntonan.

Minister di Husticia a priminti cu lo percura pa mas visibilidad di polis den nos
comunidad y el a percura por ehempel pa mas vehiculo nobo pa polis, incluyendo un
renovacion di e flota di motocicleta pa polis.

“Nos a inaugura tambe un oficina nobo di Tourist Oriented Policing den centro di ciudad
cerca di e area turistico y crusero”.

“Nos a re-introduci un helicopter pa por patruya for di aire”.

Esaki segun e mandatario, kende a sigui bisa cu su ministerio a garantiza pueblo cu lo
baha e indice di atraconan arma.

El a indica cu el a constata cu a base di e maneho integral, controlnan severo y
esfuerzonan di Cuerpo Policial y Ministerio Publico a logra baha e indice di atraco arma.

Na 2016 esaki tabata 65 y a cera 2018 cu 34.

E aña aki e indice ta relativamente abao.

“Nos a bisa tambe cu nos ta bay re-institui e miembronan di Cuerpo Policial como
supervisornan di nos leynan di admision y expulsion y esaki nos a haci na comienzo di
2018, cu a resulta di ta un exito”.

“Controlnan rigido di mas cu 400 supervisor nobo di e ley di LTU a pone cu
practicamente tur siman KPA ta gara personanan y ta traspasa nan pa Guarda Nos
Costa”, segun e mandatario.