Page 16 - ATA

Aruba Beach Club a celebra 40 aña di existencia

Monday, 01 May 2017 15:40
Comparti

E celebracion oficial di e di 40 Aniversario di Aruba Beach Club a tuma luga den e Raymond Maduro
Lounge, den presencia di dignitarionan local, miembronan di prensa, miembronan di e hunta di directiva
y amigonan di e resort.

“Nos ta celebrando e Aruba Beach Club su di 40 Aniversario na April, como Aruba su Prome Resort di
Timeshare,” Gerente General Farida Mansur a bisa den su discurso di bon bini, “Esaki sin duda ta un
ocasion sumamente special pa nos, y nos kier refleha riba e rol importante cu Aruba Beach Club a hunga
den e Desaroyo di Turismo di nos Isla.”

E encuentro oficial a conta cu Mark Benson como emcee, yamando bon bini na dignitarionan, entre nan,
e CEO di e Aruba Tourism Authority, Ronella Tjin Asjoe-Croes, e Minister di Turismo, Mike De Meza,
Presidente di e Aruba Time Share Association, Ursell Arends, otro miembronan di e hunta di directiva di
ATSA, gerentenan general di e resortnan bisinja, y e ekipo di maneho di Aruba Beach Club.

Vice Director di e Hunta di Directiva Cynthia Martorella tabatin palabranan caluroso pa bisa na nomber
di e directiva: “Nos ta akinan awe pa celebra e aniversario di un resort chikito cu un curason grandi y
hopi amor pa duna. Nos miembronan ta biniendo e resort pa hopi tempo caba, y nos a desaroya
amistadnan y relacionnan di termino largo. Nos ta manera un famia,” el a agrega.

Despues di esaki, Martorella a elogia e experiencia di vakantie na Aruba Beach Club y a expresa gratitud
pa e hecho cu e por a comparti e ocasion special aki cu hendenan local y dignitarionan.

Raymond Maduro, como e desaroyador original di e resort, a wordo invita pa duna un presentacion
cortico pero yena cu informacion, dunando anecdotanan di e prome dianan di e resort.

Invitadonan tambe a wordo introduci na e hefenan di departamento di e resort, kendenan ta ricibi e
credito pa nan maneho di un operacion exitoso.

E Minister di Turismo a duna pabien na tur esnan envolvi pa nan contribucion na turismo riba e isla.

Pasapalo y cocktails a wordo sirbi despues, acompanja pa musica di steel pan. E celebracion oficial a
wordo sigui pa un evento publico, banda di e piscina, cu bolo y fruit punch.