Page 10 - AWEMAINTA
P. 10
10 AWEMainta Dialuna, 17 Februari 2020
SETAR su Business
Event a enfoca riba
Cyber Security
Cual tabata un exito rotondo
DIAHUEBS anochi SETAR a organisa su Business Event 2020 na
Ritz Carlton Aruba. E topico di e aña aki ta un hopi actual y relevante
pa compiannan, esta “Cyber Security”. E orador invita p’e aña aki ta
sr. John Sileo, CEO di Sileo Group, un grupo di experto riba e topico
di privacidad cu ta yuda organisacionnan proteha e privacidad cu ta
impulsa nan ganashi.
Durante su discurso, Director di SETAR, sr. Roland Croes, a comparti
cu e aña aki el a cumpli 30 aña di servicio na SETAR y cu pa describi
tur loke cu a pasa den SETAR durante e 30 añanan aki tres palabra ta
bin na mente: Cambio, Innovacion y Crecemento.
Sr. Roland Croes a enfatisa cu mester percura pa SETAR nunca stop di
cambia, innova y crece como compania.
Ademas, sr. Roland Croes a repasa con e cambionan den tecnologia a
impacta SETAR ora cu internet y mobilidad a crece y kico t’e cosnan
cu SETAR a enfoca riba dje den aña 2019 den e area di tecnologia,
modernisacion, digitalisacion, desaroyo di skills y seguridad
cibernetico.
Pa aña 2020, sr. Roland Croes a indica cu SETAR lo concentra riba
mehora y reforza e “customer experience” di clientenan di SETAR.
Clientenan awendia kier stabilidad, calidad, simplicidad den prijs y
pakete como tambe balor pa nan placa.
E obhetivo ta cu pa final di 2020, clientenan di SETAR nota un
diferencia den e “reaction time” di SETAR, e stabilidad di nos rednan
y e manera cu SETAR ta reacciona riba peticionnan pa servicio.
Na su turno, e orador invita sr. John Sileo a duna un presentacion
interactivo cu humor caminda el a conta di su experiencia como un
victima di “identity theft” y e influencia cu esaki tabatin riba su bida
personal y profesional.
Sr. John Sileo a comparti algun ehempel di menazanan cibernetico cu
ta existi actualmente y con nos por ta mas alerta riba esakinan como
tambe con pa reacciona si en caso algo sosode.
E mensahe principal cu sr. John Sileo a trece pa dilanti ta cu como
compania nos mester inverti no solamente den e tecnologia sino tambe
den e aspecto humano por medio di educacion riba e topico di “Cyber
Security”. Mas educa personanan ta riba e tema, mas alerta nan lo ta y
asina yuda preveni cualkier eventualidad.
Despues di e presentacionnan a sigui pa un recepcion caminda esnan
presente por a network cu otro y intercambia di idea riba e topico di
“Cyber Security” presenta durante e evento.
