Page 7 - ARUBA BANK 1 MAART 2016

Djamars 1 Mart 2016 23

Saludo na tur nos atletanan akuatiko i fanátikonan di
deporte.

Natashon ta di fiesta! E fin di siman tras di lomba e deporte
akuatiko ‘Speedzwemmen’ tabata den spòtlait. FDOK tabata tin
su premiashon anual i natashon a bai ku e premio mayó ku ta
e premio Bèto Adriana. Esei ta yena nos ku hopi orguyo. Pabien
na Mekhay Engel, tremendo atleta sigur sigur!

Federashon Aquatiko Kòrsou ta sumamente satisfecho ku
natashon a sali viktorioso pa loke ta trata e anochi di galardon
di FDOK. Apesar ku aña 2015 a sera ku un sentimentu amargo
pa motibu ku e pisina prinsipal pa organisá kompetensha ta
será. Ban spera ku pronto e deporte di natashon lo haña komo
regalu pa nan logronan un pisina olímpiko pa por sigui ekshalá.

Typhoon Swimming Club ta e ekipo di aña di Kòrsou. E ekipo
fundá pa coach Nazario Martijn a sa di tin no ménos ku kuater
nominashon den e anochi di galardon di FDOK. Nazario mes
a keda nominá komo dirigente tékniko di aña. Mekhayl Engel
komo Deportista maskulino di aña, Esmay York komo Atleta
femenino di aña i Typhoon Swim Club komo ekipo di aña.

Nazario su soño tabata pa despues di 5 aña Typhoon sali e
team kampion di Kòrsou den natashon i el a logr’é den di seis
aña. Loke si nunka e no a pensa ku den e di shete aña lo e ta
e ekipo di aña di Kòrsou i ku e tambe lo a keda premiá komo e
dirigente tékniko di aña. Lucky seven sigur ta konta pa Typhoon
Swimming Club. Pabien ta bai na e direktiva ku Abigail Paula na
kabes i tambe na hinter e staf di coach di Typhoon Swim Club
i tur nan miembronan.

Otro notisia alentador pa e deporte di natashon ta ku siman
pasá e pisina di Asiento a habri bèk. Esaki sigur ta trese un
alivio. Buladó Swim Club ku ta e ekipo di kas di Asiento sigur
ta kontentu ku nan skema di training por bai bèk normal. Esaki
ta habri espasio tambe pa otro ekiponan tambe por amplia nan
skema di training.

Federashon Aquatiko Kòrsou ta sumamente kontentu ku
Pisina di Asiento a habri bèk. E promé kompetensha ya a keda
plania pa dia 12 di mart. E lo ta un kompetensha di sprint. Pues
landadónan lo bai kompetí riba diferente estilo pero no mas
largu ku 50meter. Ke men ta stail di sali buta huma! Manera e
muchanan yòn ta bisa den kaya.

Nos selekshon di natashon pa CARIFTA tambe ta kla.
Despues ku siman pasa tabata e último chèns ku atletanan
a haña pa buta tempu na Aruba, nos por bisa ku a konkluí e
selekshon di natashon ku lo bai representá Kòrsou na Aruba.
Pronto nos lo divulgá e atletanan ku ta forma nos selekshon
nashonal. CARIFTA Swim Champs lo tuma lugá na Martinique.

Si bo a pensa ku Perry Lindo no ta landa mas, awèl bo ta
bon ekibuká.

Perry Lindo ku tabata nos atleta ku algun aña pasá tabata
hopi serka di tempu olímpiko, aktualmente ta studia na Indian
River Junior College i ta un studiante atleta. Den fin di siman el
a sa di pone algun super bon tempu riba e estilo liber i barbulètè.
Riba 50 yarda estilo liber el a pone un tempu di 20.59 i 50 yarda
barbulètè den 22.87 sekònde. Perry a gana medaya di oro riba
tur dos evento. Perry a kontribuí pa su ekipo di relevo sali na di
5 lugá den 35 ekipo ku a kompetí. Perry tei pa keda!

Nos studiante atletanan Serginni Marten i Jairo Emer ku
tambe ta na Indian River Junior College ta kla pa mañan dia 2
di mart nan kompetí na e kompetenshanan di National Junior
College Association NJCAA. E kompetenshanan por wòrdu siguí
via di www.njcaa.org. E kompetenshanan ta di dia 2 te ku 5 di
mart.

E bentaha ku nos landadónan tin ta ku e kompetensha ta
tuma lugá na kas.

Eksito na Jairo i Serginni.