Page 10 - KPA

Fundacion Kawara a keda satisfecho cu tipnan di Polis

Wednesday, 24 February 2016 15:55
Comparti

Cuerpo Policial a haya un invitacion di Fundacion Kawara pa haci un presentacion cu e topico di
siguridad, specialmente siguridad na cas, pero dedica na nos grandinan.
John Larmonie di e seccion di Prevencion di Cuerpo Policial a sigura cu Polis ta contento cu e
invitacion y a pasa masha dushi cu nan. A comparti hopi tips y splica nan dicon prevencion ta asina
importante. Vooral nos hendenan mas grandi conoce e Aruba di antes, pero nan tambe ta conciente cu
e Aruba di antes no tey mas.
E ta e realidad cu nos tur tin cu trata cun’e y den e cuadro aki mes a duna hopi tips, cu nan mes no a
pensa riba dje nunca, con nan por proteha nan mes. Tin hopi manera awendia, cu hasta hendenan di
edad por cuida nan mes na cas, contra ladronicia entre otro. Tin biaha ta haya sin berguensanan cu ta
drenta den cas di hende grandi, probecha di nan, horta nan of hasta maltrata nan, cual ta un acto di
condena. Ta pidi famia of yiu, si bo tin un mama of ta ta biba su so, yud’e pa haci e cas mas safe pa
asina mama of papa por ta sigur na cas.
A duna e grandinan un number di telefon pa yama. A splica cu ta duna tambe un encuesta practico pa
nan yena na cas. Tambe nan por pasa durante dia y duna tips, mustrandonan cua ta e porta y
bentanan mas vulnerabel. Tambe e actitud pa hendenan cu ta bin cas, con bo mester ta cuidadoso, etc.
Ta conseha nan vooral hendenan di edad, cu ta biba nan so, pa tin un alarma, pasobra si tin un alarma,
vooral ora bo ta drumi anochi, por spierta Bo prome cu hende drenta paden. Por mira demasiado caso
cu hendenan ta lanta 3’or di marduga y haya hende den cas, cual ta inaceptabel.
Ta importante tambe pa tin un bon sistema di alarma y cacho. Cacho ta duna hopi compañerismo y
cariño, pero tambe ta un bon sistema pa proteha cas.
Segun Larmonie, nan a pasa masha dushi cu e miembronan di Fundacion Kawara y ta extende un
invitacion na otro fundacionnan, cu kier informacion riba prevencion di crimen, cu por contact sr. Lito
Lacle, sra Liliana Rasmijn of John Larmonie, pasa na Departamento di Prevencion di Crimen na
warda di Santa Cruz of via telefon 5272900 of por yama Larmonie mes na 5975212 y ta traha un cita e
ora.

Di parti di fundacion Kawara, Mildred Hart, a splica cu nan a haya un bon charla cerca John Larmonie.
El a siña e grandinan hopi cos pa nan propio siguridad, con pa proteha nan di tur e maldadnan cu tin
awendia. Si bo kier cacho, ki tipo di cacho bo mester tin, ki sorto por kies pa cuida bo cas, etc. Fundacion
Kawara ta boga pa Polis duna mas guia, manera splica con pa defende den e barionan. Promove mas
control y supervision di bisiñanan den bario, vooral unda tin hende grandi ta biba.