Page 24 - Min.soc 17 March 2015

Departamento Asunto Social cu Curso pa Mayornan

Monday, 16 March 2015 16:35
Comparti

Departamento Asunto Social (D.A.S.) diariamente ta brinda e comunidad di Aruba diferente sorto di
servicio. E team di prevencion di D.A.S. Seccion Bida y Famia ta haci uzo di cifranan for di registracion
di D.A.S. y ta sondea tambe bou di trahadonan y clientenan pa mira cual ta necesidadnan cu mas ta
resalta bou di clientenan di D.A.S.
A base di cifra y informacion ricibi team di prevencion di D.A.S. ta organisa diferente programa y curso
cu lo ta di beneficio pa e clientela di D.A.S. y comunidad di Aruba en general.
Un di e necesidadnan grandi durante di aña 2014 a resulta di ta;
Sosten pa mayornan cu educacion di nan yiunan.
Esaki a conduci cu a organisa e programa “Sosteniendo mi yiu den su desaroyo”.
Dia 3 y 4 di maart 2015 sra. Shaska Kock Ortopedagogo di D.A.S. conhuntamente cu sra. Noemie
Haddocks y sra. Corina Linssen di Tienda di Educacion a duna e curso aki.
Meta specifico di e anochinan tabata pa mayornan y educadornan cu yiunan entre 0 te cu 18 aña haya
bista den e diferente etapa di desaroyo cu nan yiunan ta pasando aden y haya tip, informacion y
habilidadnan cu ta adecua pa cada edad y etapa specifico di nan yiunan.
Tabatin un asistencia hopi halto y tur cupo disponibel a wordo yena. Un total di 43 mayor a participa na
e programa aki. Mirando e cantidad grandi di persona cu inscribi y participa na e curso aki por conclui cu
enberdad e necesidad pa sosten di mayornan pa cu educacion di nan yiunan ta grandi.
E anochinan aki a resulta di ta uno exitoso cu hopi interaccion, caminda mayornan tambe a haya
oportunidad di expresa nan preocupacionnan y tambe intercambia opinion cu otro.
Participantenan tabata hopi satisfecho cu e anochinan y a indica cu nan lo bay pone diferente punto
mesora den practica den bida diario cu nan yiu (nan).
Hopi di e participantenan tabata interesa pa sigui e otro cursonan cu D.A.S. lo draai den transcurso di e
aña 2015 manera e.o.:
*Parando keto na mi mes
* Manehando mi rabia y stress
* Communicacion positivo