Page 187 - Nji jete ne mes kosoves

184
Meqenëse shqiptarët e Kosovës ishin të okupuar dhe përcilleshin nga pushtuesit, ishte shumë e nevojshme që, përmjet ironisë, të shprehnin kuptimin e kundërt nga përmbajtja reale. Meta, në ndeja të ndryshme, kur e ka parë se s’mund të flitej drejtpërdrejt, përdorte ironinë dhe alegorinë si figura stilistike.
Nga Peja, duke udhëtuar këmbë për në Vranoc, së bashku me kushëririn e tij Isuf Bajraktarin, takojnë rastësisht një punëtor të sigurimit, të cilin nuk e njihnin. Gjatë rrugës i panjohuri i pyet se çfarë mendimi kishin për tre persona që ishin të dyshimtë për atë anë, e që këta të dy i njihnin. Meta, menjëherë vërejti qëllimin e tij dhe, në mënyrë ironike, iu përgjegj. Njeriu i sigurimit i tha Metës: “S’e fole të vërtetën”. Në një çast, kur erdhi koha të ndaheshin, ai u tregoi se punonte për sigurimin shtetëror. Meta, me përvojën e tij të gjatë, të fituar në kohë shumë të vështira, ka qenë në gjendje të kuptonte aty për aty mendimet e fshehta dhe provokative të akcilit që kishte për qëllim zbulimin e diçkajes.
Në ndeja ishte i çiltër dhe shpeshherë e përdorte humorin për të krijuar atmosferë të ngrohtë dhe të hareshme në mes shokëve dhe miqve.
Si trashëgimtar i babait të tij, u muar edhe me pajtimin e njerëzve, kur ata kishin mosmarrëveshje dhe konflikte të natyrave të ndryshme , sidomos kur këto ndodheshin në mes të afërmve, shokëve dhe miqve. Me qëndrimin që mbante- kishte krijuar autoritet në rrethin e tij dhe kudo që ndodhej zotëronte situatën.
Gjatë bisedës që kam pasur me të, sa herë që vinte në lokalet e gazetës Illyria, kam vërejtur se kishte njohuri për fiset shqiptare, degëzimet, karakteristikat e shtrirjen e tyre. Fliste për bajraqe, bajraktarë e kuvende më të rëndësishme.
Gënjeshtrën e urrente dhe e kualifikonte si burim të të gjitha të këqijave. Përmjet anektodave të ndryshme ai damkoste veset dhe dukuritë e dëmshme të njerëzve. Në një rast nga ai kam dëgjuar duke thënë se “më i mirë është kopili se budalla”. “Kopili e hjek sherrin nga shtëpia, kurse budalla nga larg e sjell atë në shtëpi”.
Mendimet e tilla i vendoste në vendin adekuat të bisedës që, gjithashtu, ishte një mjeshtri e posaçme.