Page 27 - OCR Document

NY ZAVABOARY

Ry Zavaboary, ry ilay tsara bika,

Ry tiana mamabo ny fo aman-tsaina :

Raha toa sitrakao, hiaraka isika,

Hihira, hitafa, dieny maraina!

Fa mamiko loatra noho ny tantely,

Sy tiako mihoatra an'ireo volamena

Ny feonao kanto, alonin-anjely,

Fa feo mampitsiky ny sorisorena...

Raha sendra ka tojo fotoam-pifaliana

- F'izany ary moa no fomban'ny tany -

Endre izany ianao manao fanamiana,

Mirebika ery... mihira hatrany!