Page 2 - nuusbrief 1 2025.cdr

Beste Ouers

Land die helikopter en bêre die grassnyer...

Drs. Rassie Erasmus en Daniel Amen is beide van mening dat daar oorgenoeg
geleenthede op ons pad kom wat van ons bobaas planmakers kan maak.

Rassie Erasmus, die hoogs suksesvolle Springbokafrigter het tydens 'n
geleentheid waar die FW de Klerkstigting aan hom hulde gebring het oor sy
formidabele vermoë om nasiebou aan die hand te werk, Suid-Afrikaners as
meesterplanmakers beskryf. Hy is van mening dat die talle uitdagings wat
Suid-Afrikaners daagliks ervaar, juis van ons kreatiewe innoveerders maak (klik op
die skakel: https://fwdeklerk.org/fw-de-klerk-foundation-awards-doctor-johan-
rassie-erasmus-with-the-fw-de-klerk-goodwill-award/ )

Daniel Amen, 'n bekende Amerikaanse geestesbreier voel baie sterk daaroor dat
ons geestelik swak kinders die wêreld instuur, juis omdat ons geleenthede vir hulle
om planne te maak, voortydig kaap. Kinders wat onder meer verveeld is; truie op
koue dae vergeet, boeke vergeet en toetse nie laat teken nie, moet self planne
maak (klik op die skakel: https://www.instagram.com/share/reel/BAKSVeGkQm )

As hoof het ek die afgelope week twee keer ouers wat hul kinders se kanse om self
planne te maak wou ontneem, in die voorportaal toevallig raakgeloop. Beide ouers
se kinders wat enersyds nie 'n toets laat teken het nie en andersyds een wat sy
huiswerk tuis vergeet het, is onverrigte sake terug huis toe gestuur. Daar is aan die
ouers verduidelik dat die kinders aan hul ouers se geheues werk en daarom sal
aanhou vergeet. Ek is dankbaar dat albei ouers die hoof se opvoedkundige oordeel
vertrou het en toegelaat het dat hul kinders self planne moes beraam om hul eie
moeilikheid te trotseer.

Om 'n debietpunt te vat omdat jou toets nie geteken is nie en om die toorn van die
onderwyser op die hals te haal as jou boeke tuis is, leer die kind trouens om self
verantwoordelikheid vir sy eie vergeetagtigheid te aanvaar. Die verveelde kind
wat self moet planne maak om besig te bly, het per slot van sake 'n gawe stukkie
ondernemingsgees tot gevolg.

Om jou kind as ouer in uitdagende tye by te staan is natuurlike instink, om jou kind
daagliks die geleentheid te bied om 'n innoverende planmaker te word, stel
hom/haar in staat om die harde ongenaakbare werklikheid van die grootmenslewe
eendag met groter gemak aan te pak.

Land die helikopter waarmee jy deurentyd oor jou kind huiwer en laat die
grassnyer in die tuinstoor, om sodoende onafhanklike, kreatiewe kinders groot te
maak, wat die harde werklikheid van die ondermaanse as volwassenes kan
baasraak.

Sal 'n verbod op ouers wat hul kinders in die voorportaal kom red, nie
'n gawe plan wees nie?

Groete

Dr. Louis Dey
Hoof

DIS HÓÉ ONS DIE WÁT DOEN