Page 22 - DESPA

Comparti

E edificio nobo di dr. Horacio Oduber Hospital ta consisti di 5 piso di cua 4 ta bira operacional otro luna.
Siman pasa Prome Minister Eman hunto cu colega Minister Schwengle

a haya un recorido den e edificio nobo aki compaña pa director medico Cilie y varios profesional
trahando den hospital cu a duna informacion na e mandatarionan. E lugar ta masha bunita, moderno,
aparatonan state-of-the-art, espacioso y apto pa por acomoda e pashentnan cu ta yega eynan. E personal
ta haya cursonan a base regular pa por sigui cu e ritmo di trabou y avancenan den mundo medico. Sr.
Ezzard Cilie ta masha satisfecho cu e cambionan positivo den hospital.

Director medico Cilie ta splica cu tur accion cu hospital ta tumando awor ta dirigi pa cuminsa transporta
pashentnan over dia 1 di augustus. "Esaki ta e planning, pasobra tin varios cos cu mester caba ainda. Tin
IT cu ta hopi importante. Nos ta bay basta digital den e edificio nobo y esey ta trece cu ne cu mester
cumpli cu cierto condicionnan." E enfoke 1 di augustus ta pasobra cu mester haci e otro banda di hospital
bashi pa asina cuminsa cu su renobacion. E departamento ta completamente ekipa pa funciona optimal.
Riba e pregunta si e calidad di hospital ta uno di 5 strea sr Cilie a contesta cu tres biaha 'si'. "Nos no ta
propaganda pa esaki, pasobra ta esnan cu ta haci uzo di hospital mester huzga con nan ta haya e servicio.
Mi tin cu bisa cu tur locual nos tin na cifranan awor aki pa loke ta servicio brinda na pashent ta duna nos
indicacion cu cosnan ta bayendo bon. Esaki no ta nifica cu por mehora semper. Tin varios cos cu ainda
por drecha. Mi a caba di bisa cu esnan cu ta cuminsa traha den e edificio nobo aki mester haya (module)
extra 'training for patient experience' pasobra tur loke ta tradicion bieu mester keda den e edificio bieu.
Esnan cu pasa e test ey por drenta aki den pa traha. Mi no ta bisa cu e trato y cuido awor aki ta malo,
pero e bor bira semper bira miho."
Hospital su departamento cu ta duna curso specialisa den cooperacion cu Amstel Academie
recientemente a haci entrega di diploma specialisa den neurologia na 4 nurse, loke ta algo unico den
Caribe. Riba esaki director Cilie tabatin e siguiente remarke. "Den HOH ta traha 300 enfermero/a cu tin
e dilpoma basico y entre nan tin varios hoben cu ta busca un manera pa forma un carera. Nan por
specialisa locual ta apto pa nan y ta posibel aki. Nos ta spera cu ora un curso habri cu nos ta haya e
hendenan aki pa sigui e curso, si no ta asina nos ta influencia nan pa haya interes p'e. Asina nos ta haya e
nursenan pa sigui un specialisacion. Tin hopi specialismo tumando lugar. Tin nurse cu ta bayendo pa dos
specialismo, entre otro pa SEH y ICU y na final nan ta scoge unda pa
keda."