Page 8 - AM210519

8 AWEMainta Diaranson, 19 Mei 2021

Cosecha su actividadnan creativo den mei

Cosecha tin pa luna di mei diferente actividad creativo plania. Manera
comunidad ta custumbra di Cosecha, tin workshopnan creativo cu ta
tuma lugar den e Centro Creativo na San Nicolas y tambe tin pakete
di DIY (Do-It-Yourself) na benta.

Den mei, Cosecha ta introduci e paketenan di DIY di AruFlamingo.
AruFlamingo ta conoci pa su piesanan di arte traha cu PVC. E linea di
parha cu nan ta traha y tambe ta bende via e tiendanan di Cosecha ta
inclui entre otro flamingo, barica geel, patrishi y mas parhanan local.
Mirando cu AruFlamingo su mision ta pa duna aporte na proteccion
di naturalesa y na educacion di esaki, nan a lansa un pakete di DIY
unda por traha un cas di paharito cu e material di PVC y palo. Y riba e
cas por pinta un diseño propio p’asina embeyece esaki.

Delaster dia pa registra y paga p’esaki ta diabierna 28 di mei.
Diabierna 4 di juni por buska e pakete na Cosecha Oranjestad.
E pakete aki ta inclui tur material pa traha e cas di paharito, verf,
kwashi y instruccion. Edad pa por participa ta 10 aña bai ariba, pero
supervision di adulto ta necesario ora usa clabo y schroef pa traha
e cas.

E siguiente workshop di mosaic di e artista local Merveline Geerman
t’esun di pelican. Luna pasa e workshopnan popular di mosaic a
cuminsa atrobe y publico a traha e gonzalito. Asina participantenan
por traha riba nan linea di animalnan local. E workshop aki ta di 18.00
- 20.00. Edad pa por participa ta 15 aña bai ariba y e workshop ta
tuma lugar na Cosecha San Nicolas.
Tambe e piesa di pelican ta disponibel como pakete di DIY. Delaster
dia pa registra y paga p’esaki ta diabierna 28 di mei y diabierna 4 di
juni por buska e pakete na Cosecha Oranjestad.

Diasabra 29 di mei e artista local Ana Luidens tin un workshop nobo
na San Nicolas. E biaha aki Ana ta introduci su diseño di tas cu por
colga na faha, na ingles ta yame un “Belt bag”. Durante e workshop
aki, tur hende por pinta nan propio diseño bou di guia di Ana. Cu
un “Belt bag” único, Ana y Cosecha kier inspira publico pa desaroya
nan mesun estilo den moda. E workshop aki ta di 14.00 - 16.00. Edad
pa por participa ta 15 aña bai ariba y e workshop ta tuma lugar na
Cosecha San Nicolas.
Pa mas informacion por tuma contacto cu Cosecha Oranjestad na
telefoon 5878709. Tambe por manda un email na cosechaworkshop@
gmail.com. Pa por keda informa di Cosecha su workshopnan,
artesanonan, artistanan y nan webshop nobo por bishita nan
Facebook page: Aruba-Cosecha, Instagram page: cosecha_aruba y
Webpage: www.arubacosecha.com.