Page 52 - min.jus 16 nov,2015

Homber cu a dal agente di Polis wanta den cara dilanti Hues

Publication: Monday, 16 November 2015. Categoria: Judicial

ORANJESTAD (AAN) – E homber A.G.(23) a presenta dilanti Hues pa responde pa e
acusacionnan cu Fiscal a presenta contra dje. A.G. ta wordo acusa cu riba 22 December 2012, el
a dal un agente di Polis varios biaha mokete den cara.

Tambe e ta wordo acusa cu riba 7 Juni 2014 e tabata den posecion di marihuana. A haya 16 mata
di marihuana na e cas unda e ta biba.

MALTRATO

Hues a cuminsa cu e maltrato di un agente di Polis. El a puntra A.G. pa conta kico a pasa riba e
dia ey. Segun A.G. e tabata sinta riba muraya y Polis a pasa y bolbe. Na opinion di A.G., e
agente tabata hole alcohol y tabatin intension di dal’e. E ora ey A.G. a dal’e promer. Hues a
puntr’e con e sa cu e agente M. lo bay dal’e. Hues a bisa cu tabatin testigonan cu ta bisa cu e
agente tabata bou influencia pero no tabatin indicacion cu e kier a haci algo. Ta A.G. a dal’e cu
mokete na cara. A.G. a bisa cu si un Polis bin asina riba bo, bo no ta bay pensa otro. Segun Hues
un di e testigonan a bisa cu e agente lo tabata busca problema cu A.G. Tur e otronan a mira cu
A.G. a dal e agente di Polis.

PLANTACION MARIHUANA

Hues a mustra cu na e cas caminda A.G. ta biba riba 7 di Juni 2014 a haya 16 mata di marihuana
y segun A.G. ta pa su propio uso. Hues a bisa A.G. cu A.G. sa cu ta prohibi pa tin mata di
marihuana. Hues a puntr’e si e ta usa ainda y el a bisa cu e ta usa marihuana ainda.

Hues a remarca cu tempo A.G. a dal e agente di Polis, e tabata den un tempo di prueba pa un
caso di maltrato.

EXIGENCIA DI FISCAL

Fiscal a bisa cu e ta haya legalmente proba tur dos acusacionnan. Na opinion di Fiscal, A.G.
tabatin cantidad di matanan di marihuana na cas. En total 16 mata y e no ta wordo acusa di
bendemento. El a splica Hues cu promer a purba haci transaccion pero no a logra y ta pesey awor
tin e caso penal contra A.G..

Pa loke ta e maltrato di e agente di Polis, Fiscal a bisa cu e no ta haya cu A.G. por bisa cu el a
actua den defensa propio. No tin ningun indicacion cu e agente lo kier a dal A.G. Tabatin
discussion cu e agente no ta sirbi como Recherche. A.G. a dal’e y ora e agente a lanta tabatin
tiramento di mokete.

Fiscal a exigi 500 florin di boet of 10 dia sera. El a bisa cu mester kita e 23 dianan cu e tabata
sera.