Page 32 - HOH 24 JULY 2015

Lo bin un Servicio di Emergencia y Laboratorio nobo na
Hospital

Publication: Friday, 24 July 2015. Categoria: General
Minister dr. Alex Schwengle:

ORANJESTAD (AAN): Diahuebs Minister di Salud Publico dr. Alex Schwengle, compaña pa
Prome Minister Mike Eman, a bishita Dr. Horacio E. Oduber Hospitaal pa un presentacion y tour
di e facilidadnan bao construccion, organiza pa Stichting Onroerend Goed Aruba (SOGA), cual
ta doño di e edificionan y ta encarga cu e proyecto den su totalidad.

Minister Schwengle a expresa cu e ta mira e avancenan mas di cerca cu e prome mandatario
como “leu a leu” e ta den Hospital, trahando como specialista di pulmon. E mandatario a keda
hopi satisfecho cu e anuncio cu e proyecto di expansion y renobacion di hospital ta canando keto
bay manera cu el a worde planea, tanto den e parti di tempo, como e parti di tecnologia y,
principalmente, e parti di finansa.

Proyectonan cu ta experencia retraso ta costa mas placa y aki ta papia di placa di pueblo di
Aruba, pues e mandatario ta satisfecho di tende cu tur cos ta andando keto bay manera el a worde
planea.

Minister Schwengle a comenta cu loke ta falta pa incorpora den e planning, pero e no ta
premira cu e ta bay causa retonan cu e timing di e construccion, ta e salanan di operacion. El a
splica cu e salanan lo worde hinca den e proyecto asina cu tur proceso ta cla y Parlamento ta
informa.