Page 10 - MIN ON 4 MAART 2016

Cabesante di St. Paulus School sr. Randy Arends Ta
importante pa nos muchanan tin un rolemodel den nan bida

Thursday, 03 March 2016 15:30
Tweet
Comparti

Diamars siman pasa 'EXPO Hoben y Talentoso' a yega su di dos scol na Aruba. E biaha aki ta scol basico
St. Paulus School y su alumnonan a haya e oportunidad unico di cera conoci di cerca cu algun di e
rolemodelnan cu den pasado a wordo reconoci den e bunita proyecto Hoben y Talentoso.

Alumnonan di St. Paulus School tabata masha entusiasma cu e proyecto cu a duna reconocimento na nos
propio yiunan di tera. Cabesante di St. Paulus School, sr. Randy Arends a bisa di ta masha contento cu e
scol a haya e oportunidad pa ricibi 'EXPO Hoben y Talentoso'. Desde cu el a wordo aserca e no a duda
ningun momento y a tuma e proyecto man habri. E scol tin su propio biblioteca unda muchanan ta
bishita casi tur dia y ta un luga adecua pa tene 'EXPO Hoben y Talentoso'. Segun sr. Arends den e tres
edicionnan di e bukinan di Hoben y Talentoso e por a mira varios hoben cu su persona mes a traha cu
nan, sea ta na Paulus School mes of den otro actividadnan.

“Ta masha importante pa nos alumnonan tin rolemodel den nan bida y actualmente nos tin hopi
rolemodel cu ta destaca den por ehempel deporte, arte, musica y mucho mas. Ta importante pa e
alumnonan di nos scol experiencia e EXPO y pensa cu den futuro cercano nan tambe por bira un di e
hobennan cu a forma parti di e proyecto Hoben y Talentoso,” sr. Arends a bisa. Pa awor tur alunmno ta
haya e chens di mira e EXPO y mas cu claro e cuerpo di maestro lo laga e alumnonan mes pensa kico nan
por bay haci den futuro y e EXPO lo mester sirbi como inspiracion y guia, unda e mucha por tene un
spreekbeurt of un exposicion cu ilustracion di nan mes como talento.

Por ultimo como cabesante Sr. Arends a duna su conseho na e hubentud di Aruba. “Si bo tin un soño cu
bo kier logra, bringa, lucha y traha duro pe, nada no ta bini pornada, un dia bo ta logra.”