Page 58 - Min Vos, 13 May 2015
P. 58
Minister Dr. Alex Schwengle a participa na celebracion di Dia di
Enfermeria na EPI
Ya pa varios aña caba e unidad di Salubridad y Cuido di EPI ta organiza un evento special pa
celebra Dia di Enfermeria, cu enfoke riba un topico di interes general cu tin di haci cu nan futuro
profesion como dunadornan di cuido profesional den nos comunidad.
E tema cu e studiantenan den nan di tres aña di estudio a scoge e aña aki pa elabora riba dje
tabata “Alcohol y Droga”. E studiantenan a haci tur e sondeo necesario pa presenta e tema y a
invita FADA pa participa den e programa y asina subraya prevencion y concientizacion pa cu
uzo, mal uzo y abuso di droga y alcohol.
Minister Dr. Alex Schwengle, encarga cu e cartera di Salubridad, a splica cu e parti di alcohol
specialmente ta uno cu e sa basta di dje y cu durante di su estudio el a skirbi algun articulo
tocante di entre otro alcohol relaciona cu e funcionamento den famia (alcohol en
gezinsfunctioneren).
El a bisa su interes den e tema ta debi na e echo cu el a lanta den un bario unda cu
desafortunadamente tabatin hopi uzo di alcohol y droga y cu ta danki na un bon educacion di cas
cu e mes a keda riba bon caminda.
Minister Schwengle a subraya cu e tema cu e studiantenan a scoge ta hopi importante pa Aruba,
como cu e consumo di alcohol y droga ta halto. E minister a expresa cu el a keda contento cu con
nan a organiza e dia, el a haya nan presentacion uno “tremendo” y el a gradici e studiantenan pa
a invit’e pa participa.
El a comenta cu e presentacion di FADA tambe tabata sumamente bon y cu aunke e organizacion
no ta cay bao di su cartera e ta bay papia cu nan pa yuda haci mas fuerte e posicion di FADA pa
nan yuda mas den educacion di e comunidad, particularmente e hubentud cu mester mas
atencion.
Un actividad cu a capta hopi atencion durante di e evento tabata e “bril” di FADA, cu nan a pone
e hobennan y docentenan bisti pa experiencia con un persona su bista y sentido di orientacion ta
wordo influencia ora cu nan ta bao di influencia di droga y/of alcohol.
E zorgmanager di salubridad y servicio, Donna Canhigh a expresa cu e ta wak un interes pa
enfermeria cu ta creciendo, sigur compara cu tempo cu e mes a cuminza su carera den añanan 80.
Tambe el a remarca cu e ta satisfecho pa wak cu tin mas interes pa e celebracion di e dia y siman
di enfermeria, unda cu for di comunidad mes ta dunando e profesionalnan aki mas balor.
Loke si e ta sinti, Canhigh a bisa, ta un envolvimento mas intensivo den procesonan cu
desicionnan den cuido mester of ta wordo tuma, pero hasta esey ta mehorando si e compara e
situacion di añanan 80.
