Page 23 - flip min.jus

Na opinion di mr. Andin Bikker ta un fout humano den e ley
cu por wordo coregi!

Publication: Thursday, 19 March 2015. Categoria: General

Bahamento di 4 pa 3 aña castigo pa causa desgracia bao influencia:

ORANJESTAD (AAN) — Durante e conferencia di prensa di fraccion di Partido Democracia
Real, su lider Parlamentario mr. Andin Bikker a haya pregunta tocante un cambio den ley unda a
baha castigo di prison na tres aña, na esun cu ocasiona un desgracia fatal, bao influencia di
alcohol.

Ta trata aki posiblemente di un eror involuntario, segun mr. Bikker, ken a haya e pregunta den su
calidad di Hurista cu hopi experiencia.

E parlamentario a subraya cu ora cu e ley den Codigo Penal a wordo cambia, e ta corda
claramente cu expertonan di Ministerio Publico, netamente a presenta un adicion na e ley cu un
dimension, pa trece mas facilmente esnan cu ta core bao influencia di alcohol, si nan causa un
desgracia hopi serio y cu autoridad por ta mihor ekipa pa sanciona e persona aki.

E parlamentario a remarca cu ta trata di documentonan di mas di 900 pagina y e no ta corda ora
cu a presenta e ley y cu Parlamento a studia esaki, cu tabata expresa explicitamente cu nan ta bay
rebaha cuatro aña pa tres y cu e ora ey no por tin detencion.

Parlamentario mr. Bikker a indica cu den su concepto, y a base di preguntanan cu el a haci den e
dianan aki na su coleganan, esnan cu a concebi e leynan a pone un 3 na lugar di un 4 di manera
involuntario y no intencionalmente y no a cay riba dje.

Esaki, e parlamentario a señala por wordo coregi. El a reitera cu e impresion cu a wordo crea cu
tabata algo intencional di a cambia cuater aña pa tres, no ta asina. Ademas, den e memorie van
toelichting tampoco e no a mire. E parlamentario a enfatiza cu ta leynan magno di 900 y pico
pagina, cu hopi articulo mes, cu por sosode cu de vez en cuando un ley ta “sluit in” y no ta ripara
esaki te ora algo lamentable pasa.

E parlamentario y lider di PDR mr. Bikker ta considere como un fout humano cu mester wordo
coregi. El a menciona cu cada bez cu un ley ta wordo traha e ta trek na un otro ley, y e Codigo
Penal nobo a reemplaza esun bieu, y den e caso menciona por bin cu un cambio di ley specifico,
sea pa drecha e fout of door di introduci otro ley. Esaki ta den man di gobierno, y tecnica y
huridicamente e ta relativamente facil pa wordo coregi.

http://www.diario.aw/2015/03/na-opinion-di-mr-andin-bikker-ta-un-fout-humano-den-e-ley-cu-por-
wordo-coregi/