Page 24 - flip min.jus

Minister Dowers a scucha preocupacion di habitantenan di
Mabon
Thursday, 19 March 2015 14:08

Comparti

E siman aki Minister di Husticia Arthur Dowers a sigui cu su bishita den barionan unda cu a keda
constata cu actonan delictivo a bira un problema grandi pa e habitantenan.

Despues di un reunion teni, e.o. cu habitantenan di Pos Chiquito y Sabana Basora, e titular di husticia a
cuminsa drenta e barionan pa papia cu e habitantenan y scucha cual ta tur e problemanan cu ta afecta
nan. E siman aki e mandatario tabata di bishita den e compleho di casnan di FCCA na Mabon, cu ta uno
basta grandi.

Den e bishitanan e discusionnan ta concentra riba temanan cu tin di haber cu siguridad y forma di biba,
con e barionan ta hinca den otro y e mandatario a bin constata algun decadencia den e condicion di bida,
e medio ambiente y parti social. “Nos a wordo compaña pa trahadonan di SERLIMAR pa cual nos kier
gradici e departamento pa e cooperacion cu a ricibi ultimo tempo. Nan a yuda nos haci un area cerca di
flat di apartamento limpi, unda cu tin un post di Polis. Den cierto sentido, e teritorio a wordo tuma bek
despues cu el a wordo haci un dump publico, un caminda cu nan ta sinta y haci cosnan cu no ta cuadra cu
respet cu mester existi den un bario. Nos ta spera di tin e area completamente limpi pa den algun dia
reestablece bek e servicio di Polis y percura cu e area ta keda mantene limpi.”

Na momento cu e mandatario tabata canando, el a wordo aserca door di diferente habitante kendenan a
trece nan preocupacion di loke ta pasando den e bario. Ta trata aki den su mayoria hendenan hoben cu
kisas, e mandatario ta kere, no ta wordo coregi door di mayornan y ta terorisando e bario. No solamente
ta tumando luga cantidad di robo, tin biaha di cosnan chikito, pero tambe ta menasa habitantenan. Polis
por haci su trabou, pero e mandatario ta sigui kere cu mayornan mester tuma nan responsabilidad y
coregi actitud. “Mi ta sinti cu nos ta yegando un limite unda cu ta pone demasiado Polis disponibel, y nos
lo sigui haci esey, pero e lo bay a costo di otro cosnan den comunidad. Pesey ta haci apelacion na esnan
den comunidad y mayornan, pa asumi nan responsabilidad. Si nan no educa nan yiunan, nos lo haci y e lo
bay tin consecuencia pa mas hende cu solamente e muchanan,” Minister Dowers a duna di conoce den
forma enfatico.