Page 10 - Diario

PAGINA 10 DIARIO DIAMARS 1 SEPTEMBER 2015

Comentario:

Danki mi Dios:
cumpliendo awe 25 aña

den prensa na Aruba

E fecha 1 di September ta sumamente importante pa mi, no
solamente pasobra nos ta celebra Dia di Prensa cu tur locual
e trabao aki ta implica pa nos tur pero, y muy specialmente,
pasobra mi ta cumpliendo awe 25 aña den prensa na Aruba, di
cual 23 den Matutino DIARIO.
Prome cu mi a bin Aruba mi a laga atras un trayectoria di ocho
aña como encarga di prensa den e Consulado di Venezuela na
Curacao, cu tabata un experiencia impagable pa mi, ya cu den e
area diplomatico tambe tin trabaonan hopi interesante pa haci y
esaki tabata un hopi bon tempo pa mi.
Mi tin cu gradici Dios pa esaki sigur, pero semper mi aspiracion
tabata pa haci periodismo social den comunidad, y mi soño aki
mi no por a cumpli na Curacao pasobra aya nan no a kere cu lo
mi yega di domina Papiamento. Yammer si, pero Dios tabata tin
algo otro den su plan di bida pa mi.
Un biaha mas mi tin cu bisa cu danki na Shon P. Krozendijk, mi
por a drenta traha cu Toti Arends na Corant Di Nos, cu tabata
cuminzando e tempo ey (1990) y riba 1 di September mi a ranca
bay cu mi prome dia di trabao riba part time. Despues di Corant
Di Nos, mi a traha den otro dos medio di prensa y na aña 1992
mi a compronde kico tabata e plan di Dios pa mi: forma parti di
e staff di redaccion di Matutino DIARIO. Mi mes no a durf di
acerca Diario, ta mi casa a acerca Django Simoons y despues a
sigui un proceso no mucho facil; mi a entrevista cu sr. Jossy y
sra. Nuhad Mansur, despues cu mi a entrega recortenan di corant
di algun articulo cu mi a redacta na unda mi a traha prome, y
Aureen Werleman, awor nos hefe di redaccion, a evalua nan
positivamente.
Despues a sigui pa consulta cu e redactornan cu na e momentonan
ey tabata carga DIARIO, te cu por fin, riba 1 di Juni mi a wordo
tuma den servicio, y te awe ainda, danki Dios ata’ mi akinan.
Mi gratitud cu Dios ta infinito, pasobra traha pa Matutino
DIARIO ta e stap di mas importante cu mi por a duna den mi
trayectoria laboral, cu mi a cuminza por cierto den un area
diferente, pero cu tin influencia den mi trabao tambe: e area di
salud cu mi ta gusta cubri masha cada bez cu tin ocasion.
Traha den prensa y alavez cumpli como mama na prome
lugar, como casa y como ama di cas no tabata nada facil pa
mi, pero tampoco imposible. Mi a logra gara e tres timonnan
di e gran barco aki cu yama triple responsabilidad cu exito.
Logicamente cu su ups & downs, pero semper mirando pa e bon
di mi prestacion como reportero, como mama, casa y ama di
cas. Mi “pen” ta cu locual mi a y ta sirbi e generoso comunidad
di Aruba, cu a habri porta pa mi y na unda cu sin cu mi por a
ripara mes, tin hopi hende cu ta aprecia mi trabao. E feed back
di e lector ta e inspiracion mas grandi cu mi por tin pa sigui
realiza mi trabao cu e mesun amor y perseverancia cu cual mi a
cuminza den dje, te dia Dios mes bisa "te aki, ta basta".
Mi tin cu gradici mi coleganan tur: Django Simoons cu tabata e
enlace atravez di mi casa pa drenta DIARIO, na ken tambe mi
tin cu yama danki. Na Nilton Lacle cu hopi biaha mi a acerca y
ta acerca ainda ora mi tin duda riba un tema, e manera pa skirbi
un palabra, specialmente si ta adapta for di Hulandes of Ingles.
E semper cu su carisma y dulzura a sa di duna mi un man. Juby
Naar cu tin biaha ta un tiki fastioso cu mi, pero cu tog ta aprecia
mi sin duda algun y cu tambe a coregi mi trabao hopi biaha, te
cu mi a tuma nota di tur locual e tabata coregi pa mi, pa asina mi
no lubida y baha man na ferfele. Na Robby Burleson (mi tabata
skirbi Beurleson...) cu hopi biaha mi tabata tras di dje pa scucha
un tape pa mi, ora mi no por saca algo afo cu claridad. Y sigur
Aureen ken ta clave den e oportunidad di 25 aña largo caba di
traha pe corant number uno di Aruba.
Nos ta un team grandi awendia, nos tin fotografonan cu mi ta
aprecia masha hopi mes, entre nan Gina y Maria cu ta mas pega
cu mi, y nos tin un grupo di editor cu ta cera corant cu tin un
trabao nada facil y cu tin biaha ami a yega di rabia un tiki cu
nan pasobra tal of cual articulo a keda atras. Pero berdad mester
compronde nan trabao. Mi ta referi na Yorleny, Nilton, Juby y
un par di biaha Mary.
Danki na boso tur, y henter e personal di DIARIO cu ta hopi
pa nombra, y mi gradicimento sin limite na Jossy y sra. Nuhad,
aworaki na nan yiunan cu ta lidera nos corant banda di su
mayornan, y cu mi kier sigui sirbi cu e mesun lealtad, amor pa
mi trabao y consideracion di semper. Dios drama su bendicion
riba nos Matutino Lider: Matutino DIARIO!