Page 64 - MIN ON 11NOV,2015

Minister Michelle Hooyboer a ricibi docentenan di EPI

Publication: Wednesday, 11 November 2015. Categoria: General

Lo evalua oportunidadnan den vecindario

Relaciona cu nan peticion pa construi un gymzaal

ORANJESTAD (AAN): Despues cu e scol ta existi pa 18 aña caba sin cu nunca a construi un
gymzaal pa por haci gym, e docente cu ta duna “Gym” na alumnonan di EPI a dicidi pa bay den
accion y a ricibi sosten di su coleganan docente. Nan a cana bay protesta dilanti Bestuurskantoor
pa demostra nan malcontento y entrega un carta na Gobierno.

Minister Michelle Hooyboer-Winklaar, encarga cu maneho di enseñansa a topa cu e docentenan
den protesta. A scucha nan demanda cu ta encera pa Gobierno duna un contesta den e siguiente
dianan riba e pregunta cu si lo construi un gymzaal balora na alrededor di 1 miyon florin of no.

Si no haya contesta of si e contesta no ta na satisfaccion, lo intensiva e accionnan den forma cu e
demas docentenan lo cuminsa duna les den solo pafo, como sosten na e colega di e materia di
“gymnastiek”.

Di acuerdo cu Minister Michelle Hooyboer-Winklaar, pa hopi aña e proyecto di un gymzaal
tabata riba e lista di deseo di e scol, pero pa motibo di prioridadnan diferente na EPI mes, a opta
pa inverti e placa den otro tipo proyectonan. Esey no necesariamente ta un decision cu semper ta
den man di Gobierno of di Minister.

Gobierno ta den proceso pa construi un scol nobo cerca di EPI, cu lo bira Prinses Amalia. Como
cu ta den plan di ehecucion awor, e mandatario a bisa cu lo evalua si por yega na un gymzaal
mas grandi cu lo por comparti entre e scolnan den vecindario.

Pero, pa por yega na un contesta miho balansa y cu e informacionnan corecto, lo yama un
reunion cu tur partner envolvi den e decisionnan tuma den pasado, directiva di scol DPS, DOW,
Departamento di Enseñansa, Inspeccion di Enseñansa y tur cu tin di haber cu ampliacion di un
scol y su financiamento pa evalua kico ta den alcance di e presupuesto di Gobierno.

http://www.diario.aw/2015/11/minister-michelle-hooyboer-a-ricibi-docentenan-di-epi/