Page 4 - AWEM 04-Mei-2015

4 AWEMainta Dialuna, 04 Mei 2015

Presentacion estudio
nacional riba norma
y balornan

di nos hubentud

DIASABRA mainta ultimo na Universidad di Aruba, e resultado

di e investigacion nacional riba norma y balornan di hubentud di
Aruba e keda presenta. Minister di Asunto Social, Hubentud y
Labor, drs. Paul F.T. Croes a organisa e mainta aki conhuntamente
cu studiantenan di sector Hospitalidad y Tusimo, profesor Ryan
Peterson y Dean John Warlaw. E resultadonan di estudio aki a
wordo haci dor di hobennan di Universidad di Aruba.
Mas di 2100 hoben a wordo entrevista den e investigacion
importante aki.

“Un dia importante pa Aruba completo. Resultadonan di e
investigacion aki ta di gran balor pa tur sector aki na Aruba.
Pa bo compronde hobennan den nos sociedad mihor, bo mester
puntra hobennan. Pa por tin maneho efectivo riba hubentud,
bo mester envolvi hobennan y esey ta exactamente locual e
hobennan aki a haci. E estudio aki ta balioso no solamente p’e
sector social, pero pa husticia, comercio, educacion y otronan”,
Minister Paul Croes a mustra.

Hobennan na Aruba tin hopi potencial y ta diferente na
generacionan anterior. Hobennan ta ambicioso, kier logra un
educacion mas halto y na momento di haña un trabao, flexibilidad
y oportunidad pa desaroya nan mes ta principionan cu nan ta
balora.“Resultadonan general di e estudio ta mustra cu media
tin un rol importante pa mustra aspectonan positivo di hubentud
di Aruba. Tambe cu hobennan ta dedica un promedio di 7.8 ora
pa dia riba medionan social cu ta entre otro, Face Book, Email y
Whatsapp, kiermen nos sa unda nan ta”, tabata palabranan di
Minister Paul Croes.

Gobierno tambe tin un rol importante den desaroyo di nos
pais. E preservacion y conservacion di nos naturalesa, desaroyo
economico y crea un mercado laboral mas flexibel ta parti di e
tareanan cu hobennan ta mira pa Gobierno.
Esaki ta algun di e conclusionnan di e investigacion riba e norma
y balornan di hobennan di Aruba.